ಎಷ್ಟು ಚಂದವಿರಬಹುದು?


ಎಲ್ಲೋ ಕಗ್ಗತ್ತಲು ತುಂಬಿದ ಕಾಡಲ್ಲಿ
ಕತ್ತದುಮಿ, ಉಸಿರುಗಟ್ಟಿಸುವ ಗೂಡಲ್ಲಿ,
ಮಾನವೀಯತೆ ಮಾರಿಕೊಂಡ
ಕಾಡುಜನಗಳ ನಡುವೆ
ಅವಮಾನ, ಆತಂಕ, ನೋವು ತುಂಬಿ
ಜಿಗುಟು ಜಿಗುಟಾದ ಕಪ್ಪು ನೆಲದಲ್ಲಿ
ಜಾರದಂತೆ ಗಟ್ಟಿಯಾಗಿ ಕಾಲೂರಿ ನಿಂತು
ಭರವಸೆಯ ಬೆಳಕಿಗಾಗಿ ದಿಕ್ಕುಗಳೆಡೆಗೆ
ಅಸೆ ನೋಟ ಹರಿಸುತ್ತಾ
ಮೈ ಮರೆತು ಕಾದುಕೂತು,
ಮನದೆಲ್ಲಾ ಮಧುರ ಭಾವನೆಗಳ
ಬಂಡವಾಳ ಹೂಡಿ
ಸುಂದರ ಕವಿತೆ ಬರೆವ
ನನ್ನ ಪ್ರೇಮದ ಕವಿ,
ನಿನ್ನ ಮಾಯಾ ಹಸ್ತದಿಂದ ಮೂಡಿ ಬಂದ
ಈ ಜಡಕವಿತೆಗಳೇ ಇಷ್ಟೊಂದು
ಚಂದವಿರುವಾಗ
ಇವುಗಳ ಉಗಮಸ್ಥಾನವಾದ
ನಿನ್ನ ಹಿಡಿಯಾಕಾರದ ಹೃದಯ
ಎಷ್ಟು ಚಂದವಿರಬಹುದು?
ಆ ಹೃದಯಕ್ಕೆ ತೆರೆತೆರೆಯಾಗಿ ಅಪ್ಪಳಿಸುವ
ಬೆಚ್ಚನೆ ಕೆಂಪು ರಕ್ತದ
ಅಚ್ಚ ಬಿಳುಪು ಜೀವನಪ್ರೇಮ
ಮತ್ತೆಷ್ಟು ಚಂದವಿರಬಹುದು?

************* ************