ಸ್ವಗತ

ಕೋಟ್ಯಾಧಿಪತಿಯು ನಾನು
ಬಹುಮಹಡಿ ಬಂಗಲೆಯು
ಚಿನ್ನ, ಒಡವೆಗಳಿಂದ
ತುಂಬಿತುಳುಕಾಡುವ ತಿಜೋರಿ
ಬ್ಯಾಂಕಿನಲ್ಲಿಯೂ ಉಂಟು
ರಾಶಿ ಹಣದ ಗಂಟು

ಇಷ್ಟಿದ್ದೂ ಹೀಗೇಕಿಲ್ಲಿ ಮಲಗಿಹೆನು
ಬರಿ ನೆಲದ ಮೇಲೆ?
ಹಾಸಿಗೆ, ಹೊದಿಕೆಗಳೆಲ್ಲಿ?
ಹಕ್ಕಿ ಗರಿಗಿಂತಲೂ ಮೃದುವಾಗಿದ್ದ
ನನ್ನ ಸುಪ್ಪತ್ತಿಗೆಯೀಗ ಹೋಯಿತೆಲ್ಲಿ?
ಎಲ್ಲಿ ಹೋಗಿಹರೋ ಎಲ್ಲಾ ?
ಹೆಂಡತಿ, ಮಕ್ಕಳು, ನೆಂಟರಿಷ್ಟರು ;
ಸುತ್ತಲೂ ಮುತ್ತಿದ್ದ ಆಳುಕಾಳುಗಳು?

ಕಗ್ಗತ್ತಲೆಯಲಿ, ಕೊರೆವ ಚಳಿರಾತ್ರಿಯಲಿ
ಶವಾಗಾರದ ತಂಪಿನಲಿ ಮಲಗಿರುವ
ಸಿರಿವಂತ ಶವವೊಂದು ನಡೆಸುತಿದೆ
ತನ್ನೊಳಗೆ ತಾನೇ ಮೌನ ಸಂವಾದ!

(‘ವಿದ್ಯಾರಣ್ಯ’ದ ‘ಡಿಂಡಿಮ’ಕ್ಕೆಂದು ಬರೆದಿದ್ದು)

ಕಾಡ ಬೆಳದಿಂಗಳು – ಕತ್ತಲೆ ಬೆಳದಿಂಗಳು

ರಚನೆ : ಶ್ರೀಪಾದರಾಜರು

ಗಾಯಕ : ವಿದ್ಯಾಭೂಷಣ

ಕಾಡ ಬೆಳದಿಂಗಳು ಈ ಸಂಸಾರ
ಕತ್ತಲೆ ಬೆಳದಿಂಗಳು ||ಪಲ್ಲವಿ||

ಉಂಟಾದ ಕಾಲಕ್ಕೆ ನೆಂಟರು ಇಷ್ಟರು
ಬಂಟರಾಗಿ ಬಂದು ಬಾಗಿಲ ಕಾಯ್ವರು
ಉಂಟಾದತನ ತಪ್ಪಿ ಬಡತನ ಬಂದರೆ
ಒಂಟೆಯಂತೆ ಕತ್ತ ಮೇಲಕೆ ಎತ್ತುವರು ||೧||

ಏರುವ ದಂಡಿಗೆ ನೂರಾಳು ಮಂದಿಯು
ಮೂರು ದಿನದ ಭಾಗ್ಯ ಝಣಝಣವು
ಮೂರಾರು ಸಾವಿರ ದಂಡವ ತೆತ್ತರೆ
ರಂಗವಿಠಲನನ್ನೆ ಸರಿ ಎಂಬರಯ್ಯ ||೨||