ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡ! – ಆನಂದಕಂದ

ಕವಿ : ಆನಂದಕಂದ (ಬೆಟಗೇರಿ ಕೃಷ್ಣಶರ್ಮ)
ಕವನ ಸಂಕಲನ : ನಲ್ವಾಡುಗಳು

-ಪಲ್ಲವಿ-
ನಮ್ಮ ಹಳ್ಳಿಯೂರಽ ನಮಗ ಪಾಡಽ-
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಊರಮುಂದ ತಿಳಿನೀರಿನ ಹಳ್ಳಽ-
ಬೇವು ಮಾವು ಹುಲಗಲ ಮರಚೆಳ್ಳಽ-
ದಂಡಿಗುಂಟ ನೋಡು ನೆಳ್ಳಽ ನೆಳ್ಳಽ-

ನೀರ ತರುವಾಗ ಗೆಣತ್ಯಾರ ಜೋಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ—


ನಮ್ಮ ಹಳ್ಳ ಕಾಶಿಯ ಹಿರಿಹೊಳಿಯ
ಒಮ್ಮ್ಯಾದರು ಬತ್ತಿಲ್ಲದು ತಿಳಿಯ-
ಬದಿಯ ತ್ವಾಟಗಳ ಬೆಳಸಿಗೆ ಕಳಿಯ-

ಹ್ಯಾಂಗ ಕೊಡತೈತಿ ಬಂದೊಮ್ಮೆ ನೋಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಪಡಿವಿಯ ತುಂಬಾ ಕಾಳಿನ ಚೀಲಾ-
ನಡುಮನಿಯೊಳಗಽ ಗಳಿಗಿಯ ಸಾಲಾ-
ತುಂಬಿ ಸೂಸತಾವ ಗಡಿಗಿಯಡಕಲಾ-

ಖಾಲಿ ಇಲ್ಲವ್ವಾ ಒಂದೂ ಮನಿ-ಮಾಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಹೈನದೆಮ್ಮಿ ನೋಡ ಹಾಲ ಸಮುದರಾ-
ಎಷ್ಟು ತಿನ್ನಾಕಿ ನೀ ಕೆನಿಕೆನಿ ಮಸರಾ-
ಮಜ್ಜಿಗಿ ಒಯ್ತಾರ ಊರಂತೂರಾ-

ಸೂಲಕ್ಕೊಂದು ಬಂಗಾರ್‌ಬಳಿ ಜೋಡಽ
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಹೂಡುವೆತ್ತು ಹಕ್ಕಿಗೆ ಸಿಂಗಾರಾ-
ತಿಂದ ರಿಣಾ ತೀರಸತಾವ ಪೂರಾ-
ಎತ್ತು ಅಲ್ಲ ನಮ್ಮನಿ ದೇವ್ರಾ-

ಬಸವಣ್ಣಿರದಂಥಾ ಮನಿಯದು ಕಾಡಽ
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಗರಡಿಯ ಹುಡುಗರ ಹುರುಪು ಅದೇನಽ
ಕರಡಿ-ಹಲಿಗಿಮಜಲಿನ ಮೋಜೇನಽ-
ಬಯಲಾಟದ ಸುಖಕಿಲ್ಲ ಸಮಾನ-

ಕೇಳಿಲ್ಲೇನಽ ಲಾವಣಿ ಗೀಗೀ ಹಾಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ರಾಯ ಅರಸು ನಾನಾತಗ ರಾಣಿ-
ನಮ್ಮ ಪ್ರೀತಿಯೊಳು ಸ್ವಲ್ಪೂ ಕಾಣಿ-
ಬಂದೆ ಇಲ್ಲ ನೋಡ ನನ್ನ ತವರಾಣಿ-

ನಮ್ಮ ಸಂಸಾರ ಜೇನಿನ ಗೂಡಽ
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಪ್ಯಾಟಿಯೂರಿನಾ ಬಣ್ಣದ ಹೆಣ್ಣಽ-
ಮಾಟ ಮಾಡದಲೆ ಬಿಟ್ಟಾವೇನಽ-
ನಮ್ಮ ರಾಯ ನಮಗ ದಕ್ಕ್ಯಾನೇನಽ-

ಪ್ಯಾಟೀ ಊರಂಬ ಸುದ್ದೀ ತಗಿಬ್ಯಾಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!


ಊರಕಾವಲಿಗೆ ಸೀಮಿಯ ಭರಮಾ-
ಪಾರೆ ಮಾಡತಾನ ಶ್ರೀ ಬಲಭೀಮಾ-
ಮೀರಿದ ದೇವತಿ ಗುಡಿಯೆಲ್ಲಮ್ಮಾ-

ಇವರಽ ಕರುಣಾ ತಪ್ಪಿದರೆಲ್ಲಾ ಕೇಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!

* * *

ನಮ್ಮ ಹಳ್ಳಿ ನಮಗ ಬಲೆ ಪಾಡಽ. . .
ಯಾತಕವ್ವಾ ಹುಬ್ಬಳ್ಳಿ-ಧಾರ್‍ವಾಡಽ!
————————————————————

ಮಗುವಿಗೊಂದು ಮಗು!

ಕಳೆದ ಭಾನುವಾರ ಯಾವುದೋ ಶಾಪಿಂಗ್ ಮಾಲಿನಲ್ಲಿದ್ದೆವು. ಇದ್ದಕ್ಕಿದ್ದಂತೆ ನಮ್ಮಿಂದ ಸ್ವಲ್ಪ ದೂರದಲ್ಲಿ ಸ್ಟ್ರೋಲರಿನಲ್ಲಿ ಮಲಗಿದ್ದ ಮಗುವೊಂದು ರಚ್ಚೆ ಹಿಡಿದು ಅಳತೊಡಗಿತು. ಅದರ ಜೊತೆಗೆ ಇದ್ದ ಹೆಂಗಸು ಅದನ್ನು ಸಮಾಧಾನಿಸಲು ಇನ್ನಿಲ್ಲದ ಪ್ರಯತ್ನ ಮಾಡುತ್ತಿದ್ದಳು. ಆ ಮಗು ಅವಳ ಉಪಾಯಗಳೊಂದಕ್ಕೂ ಜಪ್ಪೆನ್ನದೆ ಉಸಿರುಗಟ್ಟಿಕೊಂಡು ಕಿರುಚಿ ಅಳುತ್ತಿತ್ತು. ಅತ್ತು ಕೆಂಪುಕೆಂಪಾಗಿದ್ದ ಆ ಮಗುವಿನ ಮುಖವನ್ನು ನೋಡಿದರೆ ಅದು ಹುಟ್ಟಿ ಕೆಲವೇ ದಿನಗಳಾಗಿರಬೇಕೆನಿಸಿತು. ಮಗುವಿನ ತಾಯಿಯೆಂದು ನಾನು ತಿಳಿದಿದ್ದ ಹೆಂಗಸು ಮಗುವನ್ನು ಅಲ್ಲೇ ಬಿಟ್ಟು ಯಾರನ್ನೋ ಹುಡುಕುವಂತೆ ಅಲ್ಲಿಂದ ಹೊರಟಳು. ಐಲ್‍ಗಳ (aisle) ನಡುವೆ ಮರೆಯಾದಳು. ತಿರುಗಿ ಬರುವಾಗ ಅವಳ ಜೊತೆಗೆ ಹದಿಮೂರೋ, ಹದಿನಾಲ್ಕೋ ಇರಬಹುದಾದ ವಯಸ್ಸಿನ ಹುಡುಗಿಯೊಬ್ಬಳಿದ್ದಳು. ಅವಳೇ ಆ ಮಗುವಿನ ತಾಯಿಯೆಂದು ನಂತರ ತಿಳಿಯಿತು. ಹದಿಹರಯದ ಆ ಬಾಲೆ ತಾನು ಹೆತ್ತ ಮಗುವಿನ ಹೊಣೆಯನ್ನು ಅಮ್ಮನಿಗೊಪ್ಪಿಸಿ ತನಗೆ ಬೇಕಾಗಿದ್ದ ಲಿಪ್‍ಸ್ಟಿಕ್ಕನ್ನೋ, ಶಾಂಪುವನ್ನೋ, ಮತ್ತಾವುದೋ ಮೇಕಪ್ ಸಾಮಗ್ರಿಯನ್ನೋ ಆಸೆಯಿಂದ ತನ್ನ ತಳ್ಳುಗಾಡಿಗೆ ತುಂಬಿಸಿಕೊಳ್ಳುತ್ತಿದ್ದಿರಬೇಕು.

ತಾಯಿ – ಅವಳಿಗೂ ಚಿಕ್ಕ ವಯಸ್ಸೇ – ಕೋಪದಿಂದ ಮಗಳಿಗೆ ಅಳುತ್ತಿರುವ ಮಗುವನ್ನು ತೋರಿಸಿ ಏನೋ ಬೈದಳು. ಎಲ್ಲರ ಗಮನವೂ ತಮ್ಮತ್ತ ಹರಿದಿದ್ದು ನೋಡಿ ಅವಳಿಗೂ ಮುಜುಗರವಾಗಿರಬೇಕು. ಬಹುಶ: ಮಗುವನ್ನು ಬಿಟ್ಟು ಅಲ್ಲಿ ಇಲ್ಲಿ ಹೋಗಬೇಡವೆಂದು ಬುದ್ಧಿ ಹೇಳಿದಳೆಂದು ನಾನು ಊಹಿಸಿಕೊಂಡೆ. ತಾಯಿಯ ಬುದ್ಧಿವಾದದತ್ತ ಹುಡುಗಿಯ ಗಮನವಿದ್ದರೆ ತಾನೇ? ಅವಳ ಚಂಚಲ ನೋಟ ಸುತ್ತಮುತ್ತ ತುಂಬಿದ್ದ ಕಣ್ಣು ಸೆಳೆಯುವ ಹಲವಾರು ವಸ್ತುಗಳತ್ತ ನೆಟ್ಟಿತ್ತು. ಇನ್ನೂ ಬಾಲ್ಯದ ಆಟ, ಹುಡುಗಾಟ ಮಾಯವಾಗಿರದ, ತಾನೇ ಮಗುವಾಗಿರುವ ಆ ಹುಡುಗಿಯ ಮಡಿಲು ತುಂಬಿರುವ ಮತ್ತೊಂದು ಮಗು! ಇದಕ್ಕೆ ಏನನ್ನೋಣ? ಆಧುನಿಕತೆಯ ಅಡ್ದ ಪರಿಣಾಮ? ನವ ನಾಗರೀಕತೆ ನಮಗಿತ್ತ ಶಾಪ?

ಅಮಾಯಕತೆ ತುಂಬಿತುಳುಕುತ್ತಿದ್ದ ಆ ಎಳೆಯ ಕಣ್ಣುಗಳನ್ನು ನೋಡಿ ನನಗೇಕೋ ಬಹಳ ಸಂಕಟವಾಯಿತು.

ಗಮಗಮಾ ಗಮಾಡಸ್ತಾsವ ಮಲ್ಲಿಗಿ – ಅಂಬಿಕಾತನಯದತ್ತ

ಕವಿ – ಅಂಬಿಕಾತನಯದತ್ತ
ಕವನ ಸಂಕಲನ – ಗಂಗಾವತರಣ
ಗಾಯಕರು – ವಿಶ್ವೇಶ್, ಅಶ್ವಿನಿ
ಆಲ್ಬಮ್ – ಘಮಘಮ

ಹಾಡು ಕೇಳಿ

ಗಮಗಮಾ ಗಮಾಡಸ್ತಾsವs ಮಲ್ಲಿಗಿ | ನೀ ಹೊರಟಿದ್ದೀಗ ಎಲ್ಲಿಗಿ?
ತುಳುಕ್ಯಾಡತಾವ ತೂಕಡಿಕಿ
ಎವಿ ಅಪ್ಪತಾವ ಕಣ್ಣ ದುಡುಕಿ
ಕನಸು ತೇಲಿ ಬರತಾವ ಹುಡುಕಿ||
ನೀ ಹೊರಟಿದ್ದೀಗ ಎಲ್ಲಿಗಿ ?

ಚಿಕ್ಕಿ ತೋರಸ್ತಾವ ಚಾಚಿ ಬೆರಳ
ಚಂದ್ರಾಮ ಕನ್ನಡೀ ಹರಳ
ಮನಸೋತು ಆಯಿತು ಮರುಳ ||
ನೀ ಹೊರಟಿದ್ದೀಗ ಎಲ್ಲಿಗಿ ?

ಗಾಳಿ ತಬ್ಬತಾವ ಹೂಗಂಪ
ಚಂದ್ರನ ತೆಕ್ಕಿಗಿದೆ ತಂಪ
ನಿನ ಕಂಡರ ಕವದಾವ ಜೊಂಪ ||
ನೀ ಹೊರಟಿದ್ದೀಗ ಎಲ್ಲಿಗಿ ?

ನೆರಳಲ್ಲಾಡತಾವ ಮರದ ಬುಡsಕ
ಕೆರಿ ತೆರಿ ನೂಗತಾವ ದಡsಕ
ಹೀಂಗ ಬಿಟ್ಟು ಇಲ್ಲಿ ನನ್ನ ನಡsಕ ||
ನೀ ಹೊರಟಿದ್ದೀಗ ಎಲ್ಲಿಗಿ ?

ನನ್ನ ನಿನ್ನ ಒಂದತನದಾಗ
ಹಾಡು ಹುಟ್ಟಿ ಒಂದು ಮನದಾಗ
ಬೆಳದಿಂಗಳಾತು ಬನದಾಗ ||
ನೀ ಹೊರಟಿದ್ದೀಗ ಎಲ್ಲಿಗಿ ?

ನಾವು ಬಂದೆವಲ್ಲಿದಿಲ್ಲಿಗಿ
ಬಾಯಿ ಬಿಟ್ಟಾವಲ್ಲ ಮಲ್ಲಿಗಿ
ನೀರೊಡೆದಿತಲ್ಲ ಕಲ್ಲಿಗಿ ||
ನೀ ಹೊರಟಿದ್ದೀಗ ಎಲ್ಲಿಗಿ ?

ಬಂತ್ಯಾಕ ನಿನಗ ಇಂದ ಮುನಿಸು
ಬೀಳಲಿಲ್ಲ ನನಗ ಇದರ ಕನಸು
ರಾಯಾ ತಿಳಿಯಲಿಲ್ಲ ನಿನ್ನ ಮನಸು ||
ನೀ ಹೊರಟಿದ್ದೀಗ ಎಲ್ಲಿಗಿ ?

ಅನಂತ ಪ್ರಣಯ – ಅಂಬಿಕಾತನಯದತ್ತ

ಕವಿತೆ :ಅನಂತ ಪ್ರಣಯ
ಕವಿ : ಅಂಬಿಕಾತನಯದತ್ತ,

ಉತ್ತರಧ್ರುವದಿಂ ದಕ್ಷಿಣ ಧ್ರುವಕೂ
ಚುಂಬಕ ಗಾಳಿಯು ಬೀಸುತಿದೆ.
ಸೂರ್ಯನ ಬಿಂಬಕೆ ಚಂದ್ರನ ಬಿಂಬವು
ರಂಬಿಸಿ ನಗೆಯಲಿ ಮೀಸುತಿದೆ.

ಭೂರಂಗಕೆ ಅಭಿಸಾರಕೆ ಕರೆಯುತ
ತಿಂಗಳು ತಿಂಗಳು ನವೆಯುತಿದೆ
ತುಂಬುತ ತುಳುಕುತ ತೀರುತ ತನ್ನೊಳು
ತಾನೇ ಸವಿಯನು ಸವಿಯುತಿದೆ.

ಭೂವನ ಕುಸುಮಿಸಿ ಪುಲಕಿಸಿ ಮರಳಿಸಿ
ಕೋಟಿ ಕೋಟಿ ಸಲ ಹೊಸಯಿಸಿತು.
ಮಿತ್ರನ ಮೈತ್ರಿಯ ಒಸಗೆ ಮಸಗದಿದೆ
ಮರುಕದ ಧಾರೆಯ ಮಸೆಯಿಸಿತು.

ಅಕ್ಷಿನಿಮೀಲನ ಮಾಡದೆ ನಕ್ಷ-
ತ್ರದ ಗಣ ಗಗನದಿ ಹಾರದಿದೆ.
ಬಿದಿಗೆಯ ಬಿಂಬಾಧರದಲಿ ಇಂದಿಗು
ಮಿಲನದ ಚಿಹ್ನವು ತೋರದಿದೆ.

(ಬೇಂದ್ರೆಯವರ ಕವನಸಂಕಲನ ‘ನಾದಲೀಲೆ’ಯಲ್ಲಿ ಪ್ರಕಟವಾದ ಕವನ)

ರಥವಾನೇರಿದ ರಾಘವೇಂದ್ರ ಸದ್ಗುಣಗಣಸಾಂದ್ರ

ರಥವಾನೇರಿದ ರಾಘವೇಂದ್ರ ಸದ್ಗುಣಗಣಸಾಂದ್ರ
ಸತತ ಮಾರ್ಗದಿ ಸಂತತ ಸೇವಿಪರಿಗೆ
ಅತಿಹಿತದಲಿ ಮನೋರಥವ ಕೊಡುವೆನೆಂದು ||ಪಲ್ಲವಿ||

ಚತುರ ದಿಕ್ಕು ವಿದಿಕ್ಕುಗಳಲ್ಲಿ ಚರಿಪ ಜನರಲ್ಲಿ
ಮಿತಿಯಿಲ್ಲದೆ ಬಂದೋಲೈಸುತಲಿ ವರವ ಬೇಡುತಲಿ
ನುತಿಸುತ ಪರಿಪರಿ ನತರಾಗಿಹರಿಗೆ
ಗತಿ ಪೇಳದೆ ಸರ್ವಥಾ ನಾ ಬಿಡೆನೆಂದು ||೧||

ಅತುಳ ಮಹಿಮನ ದಿನದಲ್ಲಿ, ದಿತಿಜ ವಂಶದಲಿ
ಉತ್ಪತ್ತಿಯಾಗಿ ಉಚಿತದಲ್ಲಿ ಉತ್ತಮ ರೀತಿಯಲ್ಲಿ
ಅತಿಶಯವಿರುತಿರೆ ಪಿತನ ಬಾಧೆಗಳು
ಮನ್ಮಥಪಿತನೊಲಿಸಿದ ಜಿತ ತರುಣದಲಿ ||೨||

ಪ್ರಥಮ ಪ್ರಹ್ಮಾದ ವ್ಯಾಸಮುನಿಯೇ ಯತಿ ರಾಘವೇಂದ್ರ
ಪತಿತೋದ್ಧಾರಿಯೆ ಪಾವನಕಾರಿಯೆ ಕರಮುಗಿವೆನು ದೊರೆಯೆ
ಕ್ಷಿತಿಯೊಳು ಗೋಪಾಲವಿಠಲನ ಸ್ಮರಿಸುತ
ಪ್ರತಿ ಮಂತ್ರಾಲಯದೊಳು ಅತಿ ಮೆರೆವ ||೩||

ಬೆಳಗು – ಅಂಬಿಕಾತನಯದತ್ತ

ಕವಿತೆ :ಬೆಳಗು
ಕವಿ : ಅಂಬಿಕಾತನಯದತ್ತ,

(೧)
ಮೂಡಲ ಮನೆಯಾ ಮುತ್ತಿನ ನೀರಿನ
ಎರಕವ ಹೊಯ್ದಾ
ನುಣ್ಣ-ನ್ನೆರಕsವ ಹೊಯ್ದಾ
ಬಾಗಿಲು ತೆರೆದೂ ಬೆಳಕು ಹರಿದೂ
ಜಗವೆಲ್ಲಾ ತೊಯ್ದಾ
ಹೋಯ್ತೋ-ಜಗವೆಲ್ಲಾ ತೊಯ್ದಾ.

(೨)
ರತ್ನದ ರಸದಾ ಕಾರಂಜೀಯೂ
ಪುಟಪುಟನೇ ಪುಟಿದು
ತಾನೇ-ಪುಟಪುಟನೇ ಪುಟಿದು
ಮಘಮಘಿಸುವಾ ಮುಗಿದ ಮೊಗ್ಗೀ
ಪಟಪಟನೇ ಒಡೆದು
ತಾನೇ-ಪಟಪಟನೇ ಒಡೆದು.

(೩)
ಎಲೆಗಳ ಮೇಲೇ ಹೂಗಳ ಒಳಗೇ
ಅಮೃತsದ ಬಿಂದು
ಕಂಡವು-ಅಮೃತsದ ಬಿಂದು
ಯಾರಿರಿಸಿರುವರು ಮುಗಿಲs ಮೇಲಿಂ-
ದಿಲ್ಲಿಗೇ ತಂದು
ಈಗ-ಇಲ್ಲಿಗೇ ತಂದು.

(೪)
ತಂಗಾಳೀಯಾ ಕೈಯೊಳಗಿರಿಸೀ
ಎಸಳೀನಾ ಚವರಿ
ಹೂವಿನ-ಎಸಳೀನಾ ಚವರಿ
ಹಾರಿಸಿಬಿಟ್ಟರು ತುಂಬಿಯ ದಂಡು
ಮೈಯೆಲ್ಲಾ ಸವರಿ
ಗಂಧಾ-ಮೈಯೆಲ್ಲಾ ಸವರಿ.

(೫)
ಗಿಡಗಂಟೆಯಾ ಕೊರಳೊಳಗಿಂದ
ಹಕ್ಕೀಗಳ ಹಾಡು
ಹೊರಟಿತು-ಹಕ್ಕೀಗಳ ಹಾಡು.
ಗಂಧರ್ವರಾ ಸೀಮೆಯಾಯಿತು
ಕಾಡಿನಾ ನಾಡು
ಕ್ಷಣದೊಳು-ಕಾಡಿನಾ ನಾಡು.

(೬)
ಕಂಡಿತು ಕಣ್ಣು ಸವಿದಿತು ನಾಲಗೆ
ಪಡೆದೀತೀ ದೇಹ
ಸ್ಪರ್ಶಾ-ಪಡೆದೀತೀ ದೇಹ.
ಕೇಳಿತು ಕಿವಿಯು ಮೂಸಿತು ಮೂಗು
ತನ್ಮಯವೀ ಗೇಹಾ
ದೇವರ-ದೀ ಮನಸಿನ ಗೇಹಾ.

(೭)
ಅರಿಯದು ಆಳವು ತಿಳಿಯದು ಮನವು
ಕಾಣsದೋ ಬಣ್ಣಾ
ಕಣ್ಣಿಗೆ-ಕಾಣsದೋ ಬಣ್ಣಾ
ಶಾಂತೀರಸವೇ ಪ್ರೀತಿಯಿಂದಾ
ಮೈದೋರಿತಣ್ಣಾ
ಇದು ಬರಿ-ಬೆಳಗಲ್ಲೋ ಅಣ್ಣಾ.

ಬೇಂದ್ರೆಯವರ ಕವನಸಂಕಲನ”ಗರಿ’ಯಲ್ಲಿ ಈ ಕವಿತೆ ಪ್ರಕಟವಾಗಿದೆ.
ಈ ಕವಿತೆಯನ್ನು ಬೆಳ್ಳಿ ಮೋಡ ಚಲನಚಿತ್ರದಲ್ಲಿ ಬಳಸಿಕೊಳ್ಳಲಾಗಿದೆ.

ಗಾಯಕಿ: ಎಸ್. ಜಾನಕಿ;
ಸಂಗೀತ: ವಿಜಯಭಾಸ್ಕರ್

ಹಾಡು ಕೇಳಿ

ಬೆಣ್ಣಿಯಾಕಿ – ಆನಂದಕಂದ

ಕವಿ : ಆನಂದಕಂದ (ಬೆಟಗೇರಿ ಕೃಷ್ಣಶರ್ಮ)
ಕವನ ಸಂಕಲನ : ನಲ್ವಾಡುಗಳು

-ಪಲ್ಲವಿ-
ನಾ ಸಂತಿಗೆ ಹೋಗಿನ್ನಿ- ಆಕಿ ತಂದಿದ್ದಳೋ ಬೆಣ್ಣಿ;
ಹಿಂಡುಹೆಣ್ಣಿನಾಗಕಿಯs ಸರಿ ಒಂದು ಸವಿಸಕ್ಕರಿ ಕಣ್ಣಿ!
ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ ಬೆಣ್ಣಿ!


ತೆನಿ ತಿರಿವಿದ ಟೋಪಿನ ಸೀರಿ-ಅದ-
ರಂಚಿಗೆ ರೇಶಿಮಿ ಭಾರಿ. . .
ಬಿಸಿಲು ಬಿದ್ದ ಕಡೆ ಭಂಗಾರದsಗೆರಿ
ಮೈಯಾಗ ಕುಪ್ಪಸ ಹೂ ಜರತಾರಿ . . . .
ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ- ಬೆಣ್ಣಿ!

ಮೂಗಬಟ್ಟು ಹಾಕಿದಕಿ ಮೂಗಾ-ಕೊರ-
ದ್ಹಚ್ಚಿದ್ಹಾಂಗ ಮಾರೀ ಮ್ಯಾಗs,
ಹರಳೀನ ಝಮಿಕಿ ಕಿವಿಯಾಗs-
ತೂಗ್ಯಾಡಿ ಸುರಿಸತಿತ್ತೊ ಸೊಬಗಾ . . . .
ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ ಬೆಣ್ಣಿ!

ಮುಂಗುರುಳು ಹಾರ್‍ಯಾಡುವ ಹಣಿ-
ಚೆಲ್ವಿಕಿಯ ಖಣೀ-ನೋಡು ಥೇಟಾ . . . .
ತಂಬುಲದ ಚೆಂದುಟೀ ಅರಳಿಸಿ ಬಿಟ್ಟರ
ಆ ನಗಿ ಮಲ್ಲಿಗಿತ್ವಾಟಾ-
ಕೊರಳ ಮಣೀ-ಕೆಂಪಾದ ಕೆನ್ನಿ ಕುಣಿ
ಕರದು ಕೈಯಮಾಡಿ ಕೊಟ್ಟಿತಿ ಕಾಟಾ . . . .
ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ ಬೆಣ್ಣಿ!


ಸುಳಿಗಾಳಿ ಸರಿಸತಿತ್ತೊ ಸೆರಗಾ-
ಏನ್ಹೇಳ್ಳಿ ತುಂಬಿದೆದಿ ಮೆರಗಾ . . . .
ಪರಿವಿಲ್ಲ ಸರಿದ ಸೆರಗಿಂದಾ-ನನ-
ಗೇರಿತಾಗ ಏನೊ ಸುಂದಾ . . . .
ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ ಬೆಣ್ಣಿ!

ಕಣ್ಣೆತ್ತ ನೋಡತಿತ್ತೋ-ಮನಸೆತ್ತ ಓಡತಿತ್ತೋ!
ಬಗಿಯೇನೊ ಹಾಡತಿತ್ತೋ-ಬೆಣ್ಣಿಗಡಗಿ ಮಾತ್ರ ಮುಂದಿತ್ತೋ
ನೋಡಿದ ನಿಟ್ಟಿಗೆ ಮಿಂಚಿನ ಕೋಲಾ
ತಿಳೀದ್ಹಾಂಗ ನನಗಾತೋ ಸೋಲಾ . . . .

ನಾ ಸಂತಿಗೆ ಹೋಗಿನ್ನಿ- ಆಕಿ- ತಂದಿದ್ದಳೋ ಬೆಣ್ಣಿ!

********************

ಮೆದುವಾದ ಚಪಾತಿ ಮಾಡುವುದು ಹೇಗೆ?

ಇಲ್ಲಿ ಮೆದುವಾದ ಚಪಾತಿ ಮಾಡುವ ವಿಧಾನವನ್ನು ತಿಳಿಸಿ ಕೊಡುತ್ತಿದ್ದೀನಿ ಅಂತ ಅಂದುಕೊಂಡಿದ್ದರೆ ನಿಮ್ಮ ಊಹೆ ತಪ್ಪು.  ನಾನು ಮೆದುವಾದ ಚಪಾತಿ ಮಾಡುವುದು ಹೇಗೆ ಎಂದು ನಿಮ್ಮನ್ನೇ ಕೇಳ್ತಾ ಇದೀನಿ!

ದಕ್ಷಿಣ ಭಾರತೀಯರು ಅಕ್ಕಿಯನ್ನು ಉಪಯೋಗಿಸುವುದರಲ್ಲಿ ಎಲ್ಲರಿಗಿಂತಲೂ ಮುಂದು. ನಾವೂ ಅಷ್ಟೇ. ಅನ್ನ ದೇವರ ಮುಂದೆ ಇನ್ನು ದೇವರಿಲ್ಲ ಎಂದು ನಂಬಿದವರು.  ಅನ್ನ ಕಡಿಮೆ ಮಾಡಿ ಎಂದು ಎಲ್ಲರೂ ಹೇಳೋದು ಕೇಳಿ, ಕೇಳಿ ಬೇಜಾರಾಗಿ , ನಾನೂ ಅನ್ನ ಕಡಿಮೆ ಮಾಡಿ ದಿನವೂ ಚಪಾತಿ ಮಾಡಲು ನಿರ್ಧರಿಸಿದೆ.  ಅನ್ನದಷ್ಟು ಸುಲಭವಲ್ಲ ಇದು. time ತೊಗೊಳ್ಳುವ ಕೆಲಸ.

ನಾನು ಮಾಡುವ ಚಪಾತಿ ಕಲ್ಲಿನಂತೆ ಗಟ್ಟಿಯಾಗೇನೂ ಇರದೆ ಚೆನ್ನಾಗಿಯೇ ಇರತ್ತೆ. ಆದರೂ ನನಗೇಕೋ ತೃಪ್ತಿಯಿಲ್ಲ.   ನಾನು ಬೆಂಗಳೂರಿನಲ್ಲಿ ನಮ್ಮ ಪರಿಚಯದವರೊಬ್ಬರ ಮನೆಯಲ್ಲಿ ನೋಡಿದ ( ಮತ್ತು ಸವಿದ) ಚಪಾತಿಯ ಗುಣಮಟ್ಟವನ್ನು ಸಾಧಿಸುವುದು ಇನ್ನೂ ನನ್ನಿಂದಾಗಿಲ್ಲ. ಆ ಚಪಾತಿಗಳು ರೇಶಿಮೆಯಷ್ಟೇ (ಹೊಸದಲ್ಲ) ಮೃದುವಾಗಿದ್ದವು. ಅವರು ಚಪಾತಿ ಹೇಗೆ ಮಾಡುತ್ತಾರೆಂದು ಅಗಲೇ ವಿಚಾರಿಸಿದೆ. ಅವರು ವಿವರಿಸಿದ್ದೇ ಅಲ್ಲದೆ, ಚಪಾತಿಗಳು ಸಾಕಷ್ಟಿದ್ದರೂ, ನನ್ನ ಸಮಾಧಾನಕ್ಕಾಗಿ ಮತ್ತೂ ಒಂದೆರಡು ಚಪಾತಿಗಳನ್ನು ಮಾಡಿ ತೋರಿಸಿದರು.  ಚಪಾತಿ ಮಾಡುವ ವಿಧಾನದಲ್ಲೇನೂ ಬದಲಾವಣೆ ಇರಲಿಲ್ಲ, ಹಿಟ್ಟು ಕೂಡ ಬೇರೆಯಲ್ಲ, ಆದರೂ ನಾನು ಮಾಡಿದ ಚಪಾತಿ ಮಾತ್ರ ಹಾಗಿರಲಿಲ್ಲ 🙁

ಇಲ್ಲಿ ಸುಮಾರಾಗಿ ಯಾರ ಮನೆಯಲ್ಲಿ ಹೋಗಿ ನೋಡಿದರೂ ಎಲ್ಲರ ಮನೆ ಚಪಾತಿಯೂ (ಎಲ್ಲರ ಮನೆ ದೋಸೆ ತರ 🙂 ) ಒಂದೇ ರೀತಿ ಇರುತ್ತದೆ. ಯಾಕೆಂದರೆ,ಎಲ್ಲರೂ ಗುಜರಾತಿಗಳು ಮಾಡಿ ಕೊಡುವ ತೆಳ್ಳಗಿನ ಚಪಾತಿಗಳನ್ನೇ ತಂದು ಇಟ್ಟಿರುತ್ತಾರೆ.  ಯಾರಾದರೂ ಮನೆಯಲ್ಲಿಯೇ ಚಪಾತಿಗಳನ್ನು ಮಾಡಿದ್ದರೆ, ನಾನು ಕೇಳುವ ಪ್ರಶ್ನೆ ಇದು – “ನೀವು ಚಪಾತಿ ಹೇಗೆ ಮಾಡುತ್ತೀರಿ?” ಅದೇ ಪ್ರಶ್ನೆ ಈಗ ನಿಮಗೆ – “ನಿಮ್ಮನೆ ಚಪಾತಿ ಮೆದುವಾಗಿದ್ದರೆ, ಅದನ್ನು ಹೇಗೆ ಮಾಡುತ್ತೀರಿ?”

ನಿಮಗೇನಾದರೂ ಹೊಸ ವಿಧಾನ ಗೊತ್ತಿದ್ದರೆ ತಿಳಿಸಿ. ಗೂಗಲ್ ಲಿಂಕ್ ಬೇಡ. ನಾನಾಗಲೇ ಪ್ರಯತ್ನಿಸಿದ್ದೇನೆ. 🙂 ಕೆಲವು ತಾಣಗಳಲ್ಲಿ ಬಿಸಿನೀರಿನಲ್ಲಿ ಹಿಟ್ಟು ಕಲಿಸಿದರೆ ಮೃದುತ್ವ ಬರುತ್ತದೆ ಎಂದಿತ್ತು, ಅದನ್ನು ಪ್ರಯತ್ನಿಸಿದೆ.  ಉದಯ ಟಿವಿಯಲ್ಲಿ ,ಗೋಧಿ ಹಿಟ್ಟಿನೊಡನೆ ಮೈದಾ ಬೆರೆಸಿದರೆ ಮೃದುವಾಗಿರತ್ತೆ ಎಂದು ಮಾಡಿ ತೋರಿಸಿದರು. ದಿನವೂ ಮೈದಾ ತಿಂದರೆ ಮೈಗೊಳ್ಳೆಯದಲ್ಲವಾದ್ದರಿಂದ ಆ ಸಲಹೆಯನ್ನು ಸಾರಾಸಗಟಾಗಿ ನಿರಾಕರಿಸಿದೆ.

ಪ್ರವೀಣ ಇಲ್ಲಿದ್ದಾಗ, ( ಈಗ ಬೆಂಗಳೂರು) ಹಾಲಿನಲ್ಲಿ ಹಿಟ್ಟು ಕಲೆಸಿದರೆ ಚಪಾತಿ ತುಂಬಾ ಮೆತ್ತಗಿರುತ್ತದೆ ಎಂದು ಹೇಳಿದ್ದ. ಅದನ್ನೂ ಮಾಡಿದೆ. ಹಾಲಿನ ಕ್ಯಾನುಗಳು ಬೇಗ ಬೇಗ ಖಾಲಿಯಾದವೇ ಹೊರತು ನನ್ನ “ಕನಸಿನ” ಚಪಾತಿಯ ಸಾಕ್ಷಾತ್ಕಾರವಾಗಲಿಲ್ಲ. ನಿಮ್ಮಲ್ಲೇನಾದರೂ ಒಳ್ಳೆಯ ಸಲಹೆಗಳಿದ್ದರೆ ಬರಲಿ.

ಜೋಶಿ, ಅನ್ವೇಷಿಗಳು ಕೊಡುವ ಬಣ್ಣಬಣ್ಣದ ಐಡಿಯಾಗಳಿಗೂ ಸ್ವಾಗತ 🙂

***  ***    ***    ***   ***   ***   ***   ***