ಸಿ.ಬಿ.ಐ.ಶಂಕರ್ – ಗೀತಾಂಜಲಿ

ಚಿತ್ರ: ಸಿ.ಬಿ.ಐ.ಶಂಕರ್ (೧೯೮೯)
ಸಾಹಿತ್ಯ,ಸಂಗೀತ: ಹಂಸಲೇಖ
ಗಾಯಕರು :  ಎಸ್.ಪಿ.ಬಾಲಸುಬ್ರಹ್ಮಣ್ಯಂ,ಚಿತ್ರ

ಹಾಡು ಕೇಳಿ

ಗೀತಾಂಜಲಿ…
ಹಾಲುಗೆನ್ನೆಗೆ ವಾರೆಗಣ್ಣಿಗೆ
ನಮ್ಮೂರ ಹೆಣ್ಣಿಗೆ

ಪುಷ್ಪಾಂಜಲಿ…
ತೊಂಡೆ ಹಣ್ಣಿಗೆ
ಬಾಳೆ ದಿಂಡಿಗೆ
ದಾಳಿಂಬೆ ಹಣ್ಣಿಗೆ

ಓ ಕನಕಾಂಬರಿ ನೀನು ಬಾರದೆ
ಪೂಜೆಗೆ  ಹೂವಿಲ್ಲ
ಓ ಶ್ವೇತಾಂಬರಿ ನೀನು ಬಾರದೆ
ಉತ್ಸವ ಸಾಗಲ್ಲ|

ನೀರಾಗಲೇನೆ ನಾ?
ಮೈಯ ಮೇಲೆ ಜಾರಿ ಹೋಗಲು
ಗಾಜಾಗಲೇನೇ ನಾ?
ನಿನ್ನ ಅಂದ ಚಂದ ತೋರಲು

ಮಂಜಾಗಲೇನೆ ನಾ?
ನಿನ್ನ ಕೋಪ ತಂಪು ಮಾಡಲು
ತೇರಾಗಲೇನೆ ನಾ?
ನಿನ್ನ ಹೊತ್ತು ಕೊಂಡು ಹೋಗಲು|

ಕೇಳದೆ ದೇವಿ ವರವ ಕೊಡಳು
ಹೊಗಳದೆ ನಾರಿ ಮನಸು ಕೊಡಳು

ಓ ಕನಕಾಂಬರಿ ನೀನು ಬಾರದೆ
ಪೂಜೆಗೆ  ಹೂವಿಲ್ಲ
ಓ ಶ್ವೇತಾಂಬರಿ ನೀನು ಬಾರದೆ
ಉತ್ಸವ ಸಾಗಲ್ಲ|

ಕೈಲಾಸ ಕೈಯಲ್ಲಿ
ನೀನು ನನ್ನ ಸಂಗ ಇದ್ದರೆ
ಆಕಾಶ ಜೇಬಲಿ
ನಿನ್ನ ನಗು ಹೀಗೇ ಇದ್ದರೆ

ಕೋಲ್ಮಿಂಚು ಹೂಮಳೆ
ನಿನ್ನ ಮಾತು ಕೇಳುತ್ತಿದ್ದರೆ
ಸೀನೀರೆ ಸಾಗರ
ನಿನ್ನ ಭಾವ ಹೀಗೇ ಇದ್ದರೆ|
ಓಡದೆ ನೀನು ಜಿಂಕೆಯಾದೆ
ಹಾರದೆ ನಾನು ಹಕ್ಕಿಯಾದೆ

ಓ ಕನಕಾಂಬರಿ ನೀನು ಬಾರದೆ
ಪೂಜೆಗೆ  ಹೂವಿಲ್ಲ
ಓ ಶ್ವೇತಾಂಬರಿ ನೀನು ಬಾರದೆ
ಉತ್ಸವ ಸಾಗಲ್ಲ|

*  *  *   *  *   *

ನೆನಪಿರಲಿ – ಇಂದು ಬಾನಿಗೆಲ್ಲ ಹಬ್ಬ!

ಚಿತ್ರ: ನೆನಪಿರಲಿ (೨೦೦೫)
ಸಾಹಿತ್ಯ,ಸಂಗೀತ: ಹಂಸಲೇಖ
ಗಾಯಕಿ: ಚಿತ್ರ

ಹಾಡು ಕೇಳಿ

ಇಂದು ಬಾನಿಗೆಲ್ಲ ಹಬ್ಬ
ಗಾಳಿ ಗಂಧಕೂ ಹಬ್ಬ
ಇಂದು ಭೂಮಿಗೆಲ್ಲ ಹಬ್ಬ
ಪುಷ್ಪ ಕುಲಕೂ ಹಬ್ಬ

ಇಲ್ಲಿ ಸುಮ್ಮನಿರದ ಮನಸಿಗೂ ಹಬ್ಬ
ಇಲ್ಲಿ ಓಡುತಿರುವ ವಯಸಿಗೂ ಹಬ್ಬ

ಇಂದು ಬಾನಿಗೆಲ್ಲ ಹಬ್ಬ
ಗಾಳಿ ಗಂಧಕೂ ಹಬ್ಬ
ಇಂದು ಭೂಮಿಗೆಲ್ಲ ಹಬ್ಬ
ಪುಷ್ಪ ಕುಲಕೂ ಹಬ್ಬ

ಭುವನವೆಲ್ಲ ಅಚ್ಚರಿಗಳ ರಾಶಿ
ಅಲ್ಲಿದೆ ಮಳೆ ಹನಿ
ಇಲ್ಲಿದೆ ಬಿಸಿಲ ಬಿಸಿ
ಹೃದಯ ಬಯಸುವ ಸುಖದ ಚಿತ್ರಕೆ
ಕಣ್ಗಳೆ ಗಾಜಿನ ಪರೆದೆಯು|

ಇಂದು ಉಸಿರಿಗೆ ಹಬ್ಬ
ಉಬ್ಬುವೆದೆಗೂ ಹಬ್ಬ
ಇಲ್ಲಿ ಸುಮ್ಮನಿರದ ಮನಸಿಗೂ ಹಬ್ಬ
ಇಲ್ಲಿ ಓಡುತಿರುವ ವಯಸಿಗೂ ಹಬ್ಬ

ಇಂದು ಮರಳಿಗೆ ಹಬ್ಬ
ಉಪ್ಪು ಗಾಳಿಗೂ ಹಬ್ಬ
ಇಂದು ಕಡಲಿಗೆ ಹಬ್ಬ
ಅಪ್ಪೋ ಅಲೆಗೂ ಹಬ್ಬ

ಒಳ್ಳೆ ಕ್ಷಣಗಳ ಕೂಡಿಡಬೇಕು
ಬದುಕಿನ ನೆನಪಿಗೆ
ಋತುಗಳ ಜೂಟಾಟಕೆ
ಸೊಗಸಿನಿಂದಲೇ ಸೊಗಸ ಸವಿಯುವ
ಸೊಗಸಿಗೆ ಚೆಲುವಿನ ಹೆಸರಿದೆ|

ಇಂದು ಚೆಲುವಿಗೆ ಹಬ್ಬ
ಒಳ ಒಲವಿಗೂ ಹಬ್ಬ
ಇಲ್ಲಿ ಸುಮ್ಮನಿರದ ಮನಸಿಗೂ ಹಬ್ಬ
ಇಲ್ಲಿ ಓಡುತಿರುವ ವಯಸಿಗೂ ಹಬ್ಬ

**   **  **   **   **  **

ಕಲ್ಲರಳಿ ಹೂವಾಗಿ – ಕಲ್ಲರಳಿ

ಚಿತ್ರ – ಕಲ್ಲರಳಿ ಹೂವಾಗಿ (೨೦೦೬)
ಸಾಹಿತ್ಯ ಮತ್ತು ಸಂಗೀತ – ಹಂಸಲೇಖ
ಗಾಯಕರು – ಹೇಮಂತ್ ಮತ್ತು ಸಂಗಡಿಗರು

ಹಾಡು ಕೇಳಿ

ಕಲ್ಲರಳಿ ಹೂವಾಗಿ
ಹೂವರಳಿ ಹೆಣ್ಣಾಗಿ
ಸೊಗಡಿನ ಮಣ್ಣಿನ ಮಗಳಾಗಿ
ಭಾಗ್ಯದ ಬಾಳಿನ ಬಳೆಗಾಗಿ
ಘಲ್ಲೆಂದಳು ಎದೆಯಲಿ ಪದವಾಗಿ ||ಪ||

ಕಲ್ಲರಳಿ ಹೂವಾಗಿ
ಹೂವರಳಿ ಹೆಣ್ಣಾಗಿ
ಸೊಗಡಿನ ಮಣ್ಣಿನ ಮಗಳಾಗಿ
ಅರಿಶಿನ ಕುಂಕುಮ ಸಿರಿಗಾಗಿ
ಝುಮ್ಮೆಂದಳು ಎದೆಯಲಿ ಪದವಾಗಿ||ಅನು||

ಈ ಕಾಡಿಗೆ ಕಣ್ಣೋಳ ಕಿರುಗೆಜ್ಜೆ ದನಿಯ
ಬೆನ್ನತ್ತಿದೆ ನನ್ನ ಪಂಚೇರು ಜೀವ
ಆ ದಿಬ್ಬ ಈ ದಿಬ್ಬ ಸುತ್ತೋಳ ಸಂಗ
ಜೀಕಾಡಿದೆ ನನ್ನ ಅರೆಪಾವು ಗುಂಡಿಗೆ

ನಿನಗೊಂದು ಕೋಟೆ
ಕಟ್ಟುವೆನು ನಾನು
ರಾಣಿಯಾಗಿ ನನ್ನ
ಪಾಲಿಸುವಿಯೇನು?
ನಿನಗೆ ನನ್ನೆದೆಯೆ ಅಂತ:ಪುರ ||೧||

ಕಲ್ಲರಳಿ ಹೂವಾಗಿ
ಹೂವರಳಿ ಹೆಣ್ಣಾಗಿ
ಸೊಗಡಿನ ಮಣ್ಣಿನ ಮಗಳಾಗಿ
ಅಳಿಯದ ಹಚ್ಚೆಯ ಸುಖಕಾಗಿ
ಅಚ್ಚಾದಳು ಎದೆಯಲಿ ಪದವಾಗಿ||

ಹೊಂದೇರ ಮೇಲೇರಿ ದುರ್ಗಾದ ಸೂರ್ಯ
ಮುಚ್ಚಿಟ್ಟ ರತ್ನಾನ ತೋರಿತ್ತ ನನಗೆ
ಈ ರತ್ನಕ್ಕೆ ಚಿನ್ನದ ಕುಂದಣವಾಗೆ
ತರಾಸು ತಟ್ಟೇಲಿ ನನ್ನಿಟ್ಟ ಕೊನೆಗೆ

ನಿನ್ನ ನೆನೆದೆನಗೆ
ಬಿಸಿಲಲ್ಲೂ ಕನಸೆ
ನೀನು ಬಳುಕಾಡಿ
ತೂಗುತಿದೆ ಪರಿಸೆ
ನಿನ್ನ ಅಂದಕ್ಕೆ ಅರಸಾದೆನಾ ||೨||

ಕಲ್ಲರಳಿ ಹೂವಾಗಿ
ಹೂವರಳಿ ಹೆಣ್ಣಾಗಿ
ಸೊಗಡಿನ ಮಣ್ಣಿನ ಮಗಳಾಗಿ
ಮಾನಸ ದೇಸಿ ವಧುವಾಗಿ
ಒಂದಾದಳು ಎದೆಯಲಿ ಪದವಾಗಿ ||ಪ||

**    **    **     **     **

ಮುಂಜಾನೆಯ ಮಂಜು – ದುಂಬಿ ದುಂಬಿ

ಚಿತ್ರ: ಮುಂಜಾನೆಯ ಮಂಜು -(೧೯೯೩)
ಸಾಹಿತ್ಯ,ಸಂಗೀತ- ಹಂಸಲೇಖ
ಗಾಯಕರು – ಚಿತ್ರ, ಎಸ್.ಪಿ.ಬಾಲಸುಬ್ರಹ್ಮಣ್ಯಂ

ಹಾಡು ಕೇಳಿ

ದುಂಬಿ ದುಂಬಿ ದುಂಬಿ ದುಂಬಿ
ದೂರ ಹೋಗು ದುಂಬಿ
ಆಯಿತು ಸಾಯಂಕಾಲ

ಮಲ್ಲೆ ಮಲ್ಲೆ ಮಲ್ಲೆ ಮಲ್ಲೆ
ಇಂದು ರಾತ್ರಿ ಇಲ್ಲೆ
ನಿಂತರೆ ಅನುಕೂಲ

ಆಗದು ಹೋಯ್ ಆಗದು ಹೋಯ್
ಹಾಗಾಗದು ಹೋಯ್
ಜಾಣನಾಗಿ ಊರು ಸೇರಿಕೊ

ಮಲ್ಲೆ ಮಲ್ಲೆ ಮಲ್ಲೆ ಮಲ್ಲೆ
ಇಂದು ರಾತ್ರಿ ಇಲ್ಲೇ
ನಿಂತರೆ ಅನುಕೂಲ

ಆಗದು ಹೋಯ್ ಆಗದು ಹೋಯ್
ಹಾಗಾಗದು ಹೋಯ್
ನನ್ನ ಮುತ್ತ ಒತ್ತೆ ಇಟ್ಟುಕೊ ||ಪ||

ಊರೇಕೆ ದುಂಬಿಗೆ
ಸೂರೇಕೆ ದುಂಬಿಗೆ
ಮಲ್ಲಿಗೆ ಮರೆ ದುಂಬಿ ಹಾಡೋ ಜಾಗ
ಹಾಡಿನ ಮಧ್ಯೆ ಜೇನು ಹೀರೋ ಯೋಗ

ಜಾಣ ಜಾಣ ನೀನು
ಹಾಡಿನ ಬಾಣ ಹೂಡುವೆ
ಜೀವ ಜಾರುವಾಗ
ಅರ್ಧ ಪ್ರಾಣ ನೀಡುವೆ

ಅಂಜುವೆ ಏಕೆ ಮಲ್ಲಿ
ಕಂಪಿನ ತೋಟದಲ್ಲಿ
ಉತ್ತಮನಾಗಿ ಓಡಾಡುವೆ

ಮಾನದ ಮಲ್ಲಿ ನಾನು
ನಾಚಿಕೆ ಕಾಡದೇನು?
ಕತ್ತಲೆಗಾಗಿ ನಾ ಬೇಡುವೆ

ಆಗದು ಹೋಯ್ ಆಗದು ಹೋಯ್
ಹಾಗಾಗದು ಹೋಯ್
ಕಣ್ಣು ಮುಚ್ಚಿ ಕತ್ತಲೆಂದುಕೋ||೧||

ಬಾ ನನ್ನ ಹತ್ತಿರ
ಬಾ ಇನ್ನು ಹತ್ತಿರ
ಹತ್ತಿರ ಬಂದ ಮೇಲೆ ಹೆಚ್ಚಬೇಡ
ಮೆಚ್ಚಿನ ರಾಸಲೀಲೆ ನೆಚ್ಚಬೇಡ

ಮಾತು ಮತ್ತು ಮುತ್ತು ಈಗ ಸಾಲ ನೀಡು
ಅಂತರಂಗ ಒಪ್ಪಿದಾಗ ಪ್ರೀತಿ ಮಾಡು

ತಣ್ಣನೆಯ ಗಾಳಿಯಂತ
ಸಂಜೆಯ ರಂಗಿನಂತ
ದುಂಬಿಯ ಹಾಡಿಗೆ ಸೋಲೆನು

ಮಾಗಿಯ ಕಾಲದಂತ
ಮಾವಿನ ಹೂವಿನಂತ
ಹೆಣ್ಣಿನ ಕಂಪು ನಾ ತಾಳೆನು

ಆಗದು ಹೋಯ್ ಆಗದು ಹೋಯ್
ಹಾಗಾಗದು ಹೋಯ್
ಹಣ್ಣು ತಿಂದು ಹೆಣ್ಣು ಎಂದುಕೊ ||೨||

*** *** *** *** *** *** ***

AK-47 – ಕಡಲೋ ಕಣ್ಕಡಲೋ

ಚಿತ್ರ – AK-47 – (1999)
ಸಾಹಿತ್ಯ ಮತ್ತು ಸಂಗೀತ – ಹಂಸಲೇಖ
ಗಾಯಕರು – ಚಿತ್ರ,ಹರಿಹರನ್

ಹಾಡು ಕೇಳಿ 

ಕಡಲೋ ಕಡಲೋ ಕಣ್ ಕಡಲೋ
ಮುಗಿಲೋ ಮುಗಿಲೋ ಮನ ಮುಗಿಲೋ
ಕಡಲಲ್ಲೋ ಮುಗಿಲಲ್ಲೋ
ನೀ ನನ್ನ ತೇಲಿಸು
ಕಡಲಲ್ಲೋ ಮುಗಿಲಲ್ಲೋ
ನೀ ನನ್ನ ಬದುಕಿಸು|

ನುಡಿಮುತ್ತುದುರಿಸಬೇಡ
ಪ್ರೇಮಪತ್ರ ರವಾನಿಸಬೇಡ
ನಿನ್ನ ಮುತ್ತಿನ ನಗುವೇ ಸಾಕು
ಆ ನಗುವಲಿ ಒಪ್ಪಿಗೆ ಹಾಕು
ಅರೆ ಸಾಕು ಅರೆ ಸಾಕು
ಆ ನಗುವ ಬಿಸಾಕು|

||ಕಡಲೋ ಕಡಲೋ||

ಮನದ ಬನದ ಒಂಟಿ ಮರದ ಆಸೆ ರೆಂಬೆಗೆ
ಬಿಗಿದೆ ನೀನು ಸ್ನೇಹದ ಸರಪಳಿ ತೂಗುಯ್ಯಾಲೆಗೆ
ಒಳಗೆ ಚಿಗುರು ಹೊರಗೆ ಸಿಬಿರು
ನನ್ನ ಆಸೆಗೆ
ಆತುರ ಕಾಣೆ ಅವಸರ ಕಾಣೆ
ಯಾಕೀ ಪ್ರೀತಿಗೆ

ನಾನೂ ಹೆಣ್ಣೇ ಕಾಣದೇ?
ನನಗೂ ಒಂದು ಮನಸಿದೆ
ತುಟಿಗಳು ಎರಡು ಭಯದಲಿ ನಿಂತು
ಬಿಗಿಯಿತು ಬೀಗಗಳ|

||ನುಡಿಮುತ್ತುದುರಿಸಬೇಡ||

ಇಂದೋ ನಾಳೆ ನಗುವೆ ನೀನು ಅಂತ ಗೊತ್ತಿದೆ
ನಗದೆ ಇದ್ದರೆ ನನ್ನೀ ಪ್ರಾಣ ಕೊಡಲೂ ಗೊತ್ತಿದೆ
ನಕ್ಕರೆ ಲೋಕ ನಗುವುದು ಎಂಬ ಚಿಂತೆ ನಿನ್ನದು
ಎಷ್ಟೇ ಜನುಮ ಆದರೂ ಪಡೆಯೋ ಶಪಥ ನನ್ನದು

ಕಡಲಿಗೆ ಎರಡೂ ತೀರವಿದೆ
ಮುಗಿಲಿಗೆ ಕೊನೆಯೇ ಕಾಣದಿದೆ
ಮನಸಿನ ಮುಗಿಲ ಬೆಳಗಿಸು ಒಮ್ಮೆ
ನನ್ನೀ ಹಂಬಲಕೆ

ಗೆಳತಿಯರನು ಕೇಳಬೇಡ
ಮೇಘದೂತರ ಕಳಿಸಲುಬೇಡ
ನಿನ್ನ ಸಣ್ಣನೆ ನಗುವೇ ಸಾಕು
ಆ ನಗುವಲಿ ಒಪ್ಪಿಗೆ ಹಾಕು
ಅರೆ ಸಾಕು ಅರೆ ಸಾಕು
ಆ ನಗುವ ಬಿಸಾಕು|

||ಕಡಲೋ ಕಡಲೋ||

*   *   *    *  * *  *

ಬಲಗಾಲಿಟ್ಟು ಒಳಗೆ ಬಾ – ಹಾಡೆಂದರೆ….

 ಚಿತ್ರ ಕೃಪೆ:ದಟ್ಸ್ ಕನ್ನಡ

 ಸುವರ್ಣ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಹಂಸಲೇಖ ಅವರಿಗೆ ಅಭಿನಂದನೆಗಳು! 

ಚಿತ್ರ – ಬಲಗಾಲಿಟ್ಟು ಒಳಗೆ ಬಾ(೨೦೦೨)
ಸಾಹಿತ್ಯ,ಸಂಗೀತ – ಹಂಸಲೇಖ
ಗಾಯಕ – ಕೆ.ಜೆ.ಯೇಸುದಾಸ್

ಹಾಡು ಕೇಳಿ

ಸ..
ನಿನಿಸಸ ರಿರಿಸಸ ನಿನಿಸಸ ರಿರಿಸಸ….
ನಿನಿಸಸ ರಿರಿಸಸ ನಿನಿಸಸ ರಿರಿಸಸ….
ನಿನಿಸ ರಿರಿಸ ನಿನಿಸ ರಿರಿಸ
ನಿಸರಿಸ ಗರಿರಿಸ ಸನಿನಿಪ
ಸನಿನಿಪ ಪಮಮಗ
ಗಮಪಸ ಪನಿ ಮಪ
ಗಪಮಗರಿಸ

ಹಾಡೆಂದರೆ……
ಹಾಡೆಂದರೆ……
ಈ ಹಾಡೆಂದರೆ ಮಗುವಮ್ಮ
ಕಿಲಕಿಲ ಕಿಲಕಿಲ ನಗುವಮ್ಮ
ಜುಳುಜುಳು ಜುಳುಜುಳು ನೀರಮ್ಮಾ
ಹಾಡೆಂದರೆ ಹಾಲಮ್ಮ
ನಾದವಿನೋದದ ನೊರೆಯಮ್ಮ
ದೈವ ನಿನಾದದ ಸುರೆಯಮ್ಮಾ

ಸ್ವರಗಳ ತೇರಲ್ಲಿ…..
ನಿಸನಿಸ ಪನಿಪನಿ
ನಿಸನಿಸ ಪನಿಪನಿ
ಸ್ವರಗಳ ತೇರಲ್ಲಿ…..
ಸರಿಗರಿಸಗನಿಸನಿ ಸನಿಪಮ
ಗಮಪನಿ
ಆ ವಾಣಿಯ ಆ ಭಾವದ ಲಾಸ್ಯ ನೋಡು
ಹಾಡೆಂದರೆ ನವಿಲಮ್ಮ
ಸಾವಿರ ಕಣ್ಗಳ ಬೆಳಕಮ್ಮಾ  ||ಹಾಡೆಂದರೆ||

ತಂಗಾಳಿಯೇ….
ಜಾರಿಜಾರಿ ಮುರಳಿಯಲ್ಲಿ ಸೇರಿ, ತಂಗಾಳಿಯೆ
ಈ ತಂಗಾಳಿಯೇ
ರಾಗದ ಅವತಾರ ಪಡೆಯಲು ಕಾದಿರಲು
ಅಣುವಲಿ ಅಣು ಅಣುವು ನಾವಲ್ಲವೇ?
ರಾಗವೆ ಜಗಕೆಲ್ಲ ಮಡಿಲಲ್ಲವೇ?
ಆ ವಾಣಿಯ ತಂಪೆರೆಯುವ
ಲಾಲಿ…. ಕೇಳೂ…

ಹಾಡೆಂದರೆ ತಂಪಮ್ಮ
ಗುಯ್ ಗುಯ್ ಗುಯ್ ಗುಯ್ ಗುನುಗಮ್ಮಾ
ನಿದಿರಾ ದೇವಿಯ ನಶೆಯಮ್ಮಾ  ||ಹಾಡೆಂದರೆ||

ತುಂತುರು ಹನಿಯಲ್ಲಿ ಸಾಮವೇದ
ಮಿಂಚಿನ ಎದೆಯಲ್ಲು ಗಮಕ
ದುಂಬಿಯ ಕೊರಳಲ್ಲು ಏಕನಾದ
ಚೈತ್ರದ ಬಸಿರಲ್ಲು ಪಲುಕು
ಮಂದ್ರಾದಿ ಮಧ್ಯಾದಿ ತಾರಸ್ಥಾಯಿ
ಮಗುವಿಗೆ ಬಾಗೊ ಇನಿಯಳ ಬಳಸೋ
ದೈವಕೆ ನಮಿಸೊ ಅರ್ಥವ ತಿಳಿಸೊ|

ಮಂದ್ರಾದಿ ಮಧ್ಯಾದಿ ತಾರಾಸ್ಥಾಯಿ
ಆ….
ಆ ವಾಣಿಯ ಬ್ರಹ್ಮಾಂಡದ ಸಾರ ಕೇಳು

ಹಾಡೆಂದರೆ ಜಗವಮ್ಮ
ಬದುಕನು ರಮಿಸೋ ತಾಯಮ್ಮ
ಯುಗಗಳ ಗುರುತಿಸೋ ಗುರುವಮ್ಮಾ..  ||ಹಾಡೆಂದರೆ||

*               *                *                *

( ಈ ಹಾಡಿನಲ್ಲಿ ಬರುವ ಸ್ವರಗಳನ್ನು ಬರೆದುಕೊಟ್ಟ ಮನ ಅವರಿಗೆ ಧನ್ಯವಾದಗಳು. ತಪ್ಪಿದ್ದರೆ, ಸಂಗೀತ ಬಲ್ಲವರು ದಯವಿಟ್ಟು ತಿದ್ದುಪಡಿ ಸೂಚಿಸಿ.)

ಶೃಂಗಾರ ಕಾವ್ಯ – ಶೃಂಗಾರ ಕಾವ್ಯ ಬರೆದನು

ಚಿತ್ರ – ಶೃಂಗಾರ ಕಾವ್ಯ – ೧೯೯೩
ಸಾಹಿತ್ಯ ಮತ್ತು ಸಂಗೀತ – ಹಂಸಲೇಖ
ಗಾಯಕ – ಎಲ್.ಎನ್. ಶಾಸ್ತ್ರಿ

ಹಾಡು ಕೇಳಿ

ಶೃಂಗಾರ ಕಾವ್ಯ ಬರೆದನು
ಸಂಗೀತ ಸಾರ ಸುರಿದನು
ಉಸಿರ ಹಿಡಿದ
ತಂತಿ ಕಡಿದ
ಇನ್ನು ಮೌನ ಗಾನವೇ |

ಕಲೆಗಾರ ಕಡೆದು ಕರುಬಿದ
ಕಥೆಗಾರ ಕಥೆಯ ಕೆಡಿಸಿದ
ಹೊಣೆಗಾರ ಹರಸಿ ಹಲುಬಿದ
ಬೆಳೆಗಾರ ಬರವ ಬರಿಸಿದ
ಕನಸು ಸುರಿದ
ಕಣ್ಣೇ ತೆಗೆದ
ಇನ್ನು ಶೂನ್ಯ ಗಾನವೇ ||೧||

ವರವಾಗಿ ಒಲವ ತಂದನು
ಮರವಾಗೋ ಗಿಡವ ಕಡಿದನು
ಶುಭವಾಗಲೆಂದು ನುಡಿದನು
ಸುಖ ಕಾಣುವಾಗ ಮುನಿದನು
ಜಯವ ಕಡೆದ
ಭಯವ ಸುರಿದ
ಇನ್ನು ಶೋಕ ಗಾನವೇ ||೨||

***

ಪೂಜಾ – ಅನುರಾಗ ಚೆಲ್ಲಿದಳು

ಚಿತ್ರ : ಪೂಜಾ – (೧೯೯೫)
ಸಾಹಿತ್ಯ ಮತ್ತು ಸಂಗೀತ: ಹಂಸಲೇಖ
ಗಾಯಕರು : ಎಸ್.ಪಿ.ಬಾಲಸುಬ್ರಹ್ಮಣ್ಯಂ ಮತ್ತು ಚಿತ್ರಾ

ಹಾಡು ಕೇಳಿ –

ಅನುರಾಗ ಚೆಲ್ಲಿದಳು ಹೃದಯಾನ ಗಿಲ್ಲಿದಳು
ಹರೆಯದ ಅರಮನೆ ಬಾಗಿಲ ತೆರೆಸಿದಳು
ಪ್ರೇಮದ ರಾಜ್ಯದ ಓಲಗ ನಡೆಸಿದಳು

ಅನುರಾಗ ಚೆಲ್ಲಿದನು ಹೃದಯಾನ ಗಿಲ್ಲಿದನು
ಹರೆಯದ ಅರಮನೆ ಬಾಗಿಲ ತೆರೆಸಿದನು
ಪ್ರೇಮದ ರಾಜ್ಯದ ಓಲಗ ನಡೆಸಿದನು ||ಪ||

ದೇವಲೋಕದ ಮುಗಿಲಿಂದ
ಕಾಲು ಜಾರಿದಾ ರತಿ ಇವಳು
ನನ್ನವಳು ಕಾರಂಜಿ
ಪ್ರೇಮಲೋಕದ ಬನದಲ್ಲಿ
ಗಿಣಿಯು ಸೋಕದ ಹಣ್ಣಿವಳು
ನನ್ನವಳು ಅಪರಂಜಿ
ಕೋಟಿ ಕಣ್ಣನ್ನು ದಾಟಿ
ನನ್ನ ಕಣ್ಣನ್ನೆ ಮೀಟಿ
ನಿಂತಾ ರಥಾನ ಎಳೆದು
ನನ್ನ ವ್ರತಾನ ಮುರಿದು
ಒಲವಿನ ಹಾಲಲಿ…. ಚೆಲುವಿನ ಜೇನಲಿ…
ಬದುಕಿನ ಬಾಯಿಗೆ ಚುಂಬಿಸುತಾ ||೧||

ಮಾಯ ಮಾಡಿ ಮನದಲ್ಲಿ
ಪ್ರೇಮ ಶಾಸನವ ಕಡೆದವನು
ನನ್ನವನು ಕಲೆಗಾರ
ನಾನು ನೀನು ಒಂದೆಂದು
ಭಾವಲಿಪಿಯಲಿ ಬರೆದವನು
ನನ್ನವನು ಮನಚೋರ
ನಾನು ಹೂ ಬಿಟ್ಟ ಮಳ್ಳಿ
ಇವನಾ ಮೈಯಲ್ಲಿ ಬಳ್ಳಿ
ಸುಗ್ಗಿ ಸುವ್ವಾಲೆಯಂತೆ
ನಾವೂ ಒಂದಾದೆವಿಲ್ಲಿ
ಪದಗಳ ಪೋಣಿಸಿ… ಸ್ವರಗಳ ಸೇರಿಸಿ..
ಪ್ರೇಮದ ರೂಪವ ತೋರಿಸುವಾ||೨||

***

ಹೂವು ಹಣ್ಣು – ನಿಂಗಿ ನಿಂಗಿ

ಹೂವು ಹಣ್ಣು -೧೯೯೬
ಸಾಹಿತ್ಯ ಮತ್ತು ಸಂಗೀತ: ಹಂಸಲೇಖ
ಗಾಯಕ: ಸಿ. ಅಶ್ವಥ್ ಮತ್ತು ಸಂಗಡಿಗರು

ಹಾಡು ಕೇಳಿ – 

ಹೊಯ್ಯಾರೆ ಹೊಯ್ಯ ಹೊಯ್ಯಾರೆ ಹೊಯ್ಯ
ಹೊಯ್ಯಾರೆ ಹೊಯ್ಯಾರೆ ಹೊಯ್

ನಿಂಗಿ ನಿಂಗಿ ನಿಂಗಿ ನಿಂಗಿ
ನಿದ್ದಿ ಕದ್ದೀಯಲ್ಲೆ ನಿಂಗಿ
ನಿಂಗಿ ನಿಂಗಿ ನಿಂಗಿ ನಿಂಗಿ
ಆಸಿ ಎದ್ದೀತಲ್ಲೆ ನಿಂಗಿ

ಚಂದಾನ ಚಂದ್ರ – ಹೊಯ್ಯಾರೆ ಹೊಯ್ಯ
ಭೂಮಿಗ ಲಾಂದ್ರ – ಹೊಯ್ಯಾರೆ ಹೊಯ್ಯ
ಆಗ್ಯಾನ ನೋಡಲ್ಲಿ |

ವಾರಿ ನೋಟ ಬೀರುವಾಕಿ
ನಾಚಿಕೊಂಡು ನಿಂತಿ ಯಾಕ ?
ಬಾಳಿ ದಿಂಡ ಹೋಲುವಾಕಿ ಬಾಗಿಲಾಗ ಇರಬೇಕ ?
ಯಾಕ ಹಿಂಗ ಕಾಡುತಿ?
ನೋಯುಹಂಗೆ ಮಾಡುತಿ?

ಬಿಲ್ಲಿನಂಗ ತಾಗುತಿ
ಹೆಣ್ಣ ಬಾಣ ಹೂಡುತಿ
ಲಾ ಲ ಲ ಲಾಲ ಲಲ್ಲಲಲ್ಲ……. ಲಾಲ

ನಿದ್ದಿಯೆಂಬುದು ಒಂದು ದೇವತಿ
ಪ್ರೇಮಿಗಳಿಗಾಕಿ ಸವತಿ
ಏನ ಗರತಿ ನಿನ್ನ ಸವತಿ
ಬಂದರೀಗ ಏನ ಮಾಡುತಿ?
ಯಾಕ ತಡ ಮಾಡುತಿ?
ವ್ಯಾಳಿ ಮುಖ ನೋಡುತಿ?

ಚಂದ್ರಮುಖಿ ಹೋಲುತಿ
ಯಾವ ಸುಖ ಬೇಡುತಿ
ಲಾ ಲ ಲಾಲ ಲಲ್ಲಲಲ್ಲ……. ಲಾಲ

*          *          *

ಪ್ರೀತ್ಸೋದ್ ತಪ್ಪಾ? – ಸೋನೆ ಸೋನೆ

ಪ್ರೀತ್ಸೋದ್ ತಪ್ಪಾ – (೧೯೯೮)         

ಸಾಹಿತ್ಯ :   ಹಂಸಲೇಖ
ಸಂಗೀತ :   ಹಂಸಲೇಖ
ಗಾಯಕರು : ಕೆ. ಜೆ. ಯೇಸುದಾಸ್, ಅನುರಾಧಾ ಶ್ರೀರಾಂ

ಹಾಡು ಕೇಳಿ

ಏನಿದು ಮಾಯೆ.. ಏನಿದು ಮಾಯೆ
ಮನಸಿನ ಮುಗಿಲಲಿ
ಮಾತಿನ ಮಳೆಯು ತುಂಬಿದೆ
ಹೊರಗೆ ಬಾರದೆ ನಿಂತಿದೆ
ಮಿಂಚಿದೆ ಗುಡುಗಿದೆ
ಸೋನೆ ಮಳೆಯಾಗಿ ಆದರೂ
ಮೆಲ್ಲ ಮೆಲ್ಲ ಬರಬಾರದೇ?
ಓ ….. ಸೋನೆ ….

ಸೋನೆ ಸೋನೆ ಪ್ರೀತಿಯ ಸೋನೆ
ಈ ಮಳೆ ಹೂಮಳೆ
ಪ್ರೀತಿಯ ವರಗಳೆ
ಅಂದದ …. ಧರಣಿಯ
ತನುವಿನ ಪಥದಲಿ
ಪ್ರೀತಿಯ ಅಕ್ಷರ ಇಂದು ವೃಂದ ತಾವಾಗಿದೆ
ನಳಿನ ನರ್ತನ ಮಾಡಿದೆ||

ಈ ಬ್ರಹ್ಮಾಂಡವೇ ನಾನು
ನನಗೆ ಸಂಗಾತಿ ನೀನು
ನಿನ್ನ ಪ್ರೀತಿ ತೋಳಲ್ಲಿ ನಾನು
ಕುಂತರೂ ನಿಂತರೂ
ನಿನ್ನದೇ ತುಂತುರು
ನೆನೆದಿದೆ ನನ್ನೆದೆ ||

ಸೋನೆ ಸೋನೆ ಪ್ರೀತಿಯ ಸೋನೆ
ಸೋನೆ ಸೋನೆ ಪ್ರೀತಿಯ ಸೋನೆ
ನಿರ್ಮಲ ಕೋಮಲ ಶೀತಲ ಶಾಂತಲ
ಕಾವ್ಯದಾ …….
ಕಾವ್ಯದ ಕುಸುರಿಯೇ
ಕವನದ ಲಹರಿಯೇ
ಅಂದದ ಪ್ರತಿಮೆಯೇ
ನಿನ್ನ ಅಂದ ಛಂದೋಮಯ
ನಿನ್ನ ಭಾವ ವ್ಯಾಕರಣಮಯ ||

ಸೋನೆ ಸೋನೆ ಸೋನೆ ಸೋನೆ

ಏನಿದು ಮಾಯೆ
ಏನಿದು ಮಾಯೆ
ಮನಸಿನ ಭೂಮಿಲಿ
ಋತುವು ಬದಲಾದ ಹಾಗಿದೆ
ಆಸೆ ಮಲೆನಾಡು ಚಿಗುರಿದೆ

ಓ …. ಕನಸೇ
ಓ …. ನನಸೇ

* * *