ಸಂಜೆಗೆನ್ನ ಪಯಣ – ಕೆ.ಎಸ್.ನರಸಿಂಹಸ್ವಾಮಿ

ಕವಿ – ಕೆ.ಎಸ್.ನರಸಿಂಹಸ್ವಾಮಿ
ಗಾಯಕ – ಡಾ.ರಾಜ್‍ಕುಮಾರ್
ಸಂಗೀತ – ಸಿ.ಅಶ್ವಥ್

ಹಾಡು ಕೇಳಿ

ಸಂಜೆಗೆನ್ನ ಪಯಣವೆಂದು ತಿಳಿದಳೆನ್ನ ಸುಂದರಿ
ನನ್ನ ಮುಂದೆ ಬಂದು ನಿಂದು ತಡೆದಳಿಂತು ವಿನಯದಿ |

ಕೆಂಪು ತುಟಿಗಳಿಂದ ಹರಸಿ ನುಡಿಯಲಿಲ್ಲ ನಿಜವನು
ತೆರೆದ ಕಂಗಳುದಕ ಸುರಿಸಿ ತೊಳೆದುವೆನ್ನ ಮನವನು
ಕಣ್ಣ ಹನಿಯು ಮಣಿಯ ತೆರದಿ ಕಣ್ಣಿನೊಡವೆ ಆಯಿತು
ತುಟಿಗೆ ಬಂದ ಮಾತು ತಿರುಗಿ ಬಂದ ಕಡೆಗೆ ಹೋಯಿತು ||

ಮುಗಿಲ ಹಿಂದೆ ಹಗಲು ಜಾರಿ ಹೊನ್ನ ಬೆಳಕನೆರೆಯಿತು
ಮೌನದೊಳಗೆ ಪ್ರೇಮ ತೋರಿ ಹಂಬಲ ಮಳೆಗರೆಯಿತು
ನಲ್ಲೆ ಮುಡಿದ ಮೊಲ್ಲೆಯರಳು ‘ಇಲ್ಲೇ ನಿಲ್ಲಿ’ರೆಂದಿತು
ಓರೆಗಣ್ಣಿನೊಂದು ಹೊರಳು ‘ಹೋಗಬೇಡಿ’ರೆಂದಿತು ||

ಇರುಳನಲ್ಲೇ ಕಳೆಯಲಿಲ್ಲ, ಅಪ್ಪಿ ಮುತ್ತನೊತ್ತಲಿಲ್ಲ
ಕಣ್ಣನೀರನೊರಸಲಿಲ್ಲ, ಒರಟನಾದೆನು ಏತಕೆ?
ಸರಸ ವಿರಸವಾಯಿತಲ್ಲ, ಹೊರಟು ಬಂದೆನು ಏತಕೆ?||

*   *    *     *    *    *    *    *   *    *