ಸ್ವಗತ

ಕೋಟ್ಯಾಧಿಪತಿಯು ನಾನು
ಬಹುಮಹಡಿ ಬಂಗಲೆಯು
ಚಿನ್ನ, ಒಡವೆಗಳಿಂದ
ತುಂಬಿತುಳುಕಾಡುವ ತಿಜೋರಿ
ಬ್ಯಾಂಕಿನಲ್ಲಿಯೂ ಉಂಟು
ರಾಶಿ ಹಣದ ಗಂಟು

ಇಷ್ಟಿದ್ದೂ ಹೀಗೇಕಿಲ್ಲಿ ಮಲಗಿಹೆನು
ಬರಿ ನೆಲದ ಮೇಲೆ?
ಹಾಸಿಗೆ, ಹೊದಿಕೆಗಳೆಲ್ಲಿ?
ಹಕ್ಕಿ ಗರಿಗಿಂತಲೂ ಮೃದುವಾಗಿದ್ದ
ನನ್ನ ಸುಪ್ಪತ್ತಿಗೆಯೀಗ ಹೋಯಿತೆಲ್ಲಿ?
ಎಲ್ಲಿ ಹೋಗಿಹರೋ ಎಲ್ಲಾ ?
ಹೆಂಡತಿ, ಮಕ್ಕಳು, ನೆಂಟರಿಷ್ಟರು ;
ಸುತ್ತಲೂ ಮುತ್ತಿದ್ದ ಆಳುಕಾಳುಗಳು?

ಕಗ್ಗತ್ತಲೆಯಲಿ, ಕೊರೆವ ಚಳಿರಾತ್ರಿಯಲಿ
ಶವಾಗಾರದ ತಂಪಿನಲಿ ಮಲಗಿರುವ
ಸಿರಿವಂತ ಶವವೊಂದು ನಡೆಸುತಿದೆ
ತನ್ನೊಳಗೆ ತಾನೇ ಮೌನ ಸಂವಾದ!

(‘ವಿದ್ಯಾರಣ್ಯ’ದ ‘ಡಿಂಡಿಮ’ಕ್ಕೆಂದು ಬರೆದಿದ್ದು)