ಶಾನುಭೋಗರ ಮಗಳು – ಕೆ.ಎಸ್.ನರಸಿಂಹಸ್ವಾಮಿ

ಕವಿ – ಕೆ.ಎಸ್.ನರಸಿಂಹಸ್ವಾಮಿ
ಗಾಯಕ – ಜಿ.ವಿ.ಅತ್ರಿ
ಸಂಗೀತ – ಸಿ.ಅಶ್ವಥ್

ಜಿ.ವಿ ಅತ್ರಿ/ಚಿತ್ರಕೃಪೆ:ವಿಶ್ವಕನ್ನಡ.ಕಾಂ

ಹಾಡು ಕೇಳಿ 

ಶಾನುಭೋಗರ ಮಗಳು ತಾಯಿಯಿಲ್ಲದ ಹುಡುಗಿ
ರತ್ನದಂತಹ ಹುಡುಗಿ ಊರಿಗೆಲ್ಲ
ಬಲು ಜಾಣೆ ಗಂಭೀರೆ ಹೆಸರು ಸೀತಾದೇವಿ
ಹನ್ನೆರಡು ತುಂಬಿಹುದು ಮದುವೆಯಿಲ್ಲ |

ತಾಯಿಯಿಲ್ಲದ ಹೆಣ್ಣು ಮಿಂಚ ಬೀರುವ ಕಣ್ಣು
ಒಮ್ಮೊಮ್ಮೆ ಕಣ್ಣೀರ ಸರಸಿಯಹುದು
ತಾಯಿಯಂದದಿ ಬಂದು ತಂಪನೆರೆಯುವುದೆಂದು
ಇಂಥ ಬಾಳಿಗೆ ಒಲವೇ ನಿನ್ನ ಕನಸು |

ಹತ್ತಿರದ ಕೆರೆಯಿಂದ ತೊಳೆದ ಬಿಂದಿಗೆಯೊಳಗೆ
ನೀರ ತರುವಾಗವಳ ನೋಡಬೇಕು
ಕರುವನಾಡಿಸುವಾಗ ಮಲ್ಲಿಗೆಯ ಬನದೊಳಗೆ
ಅವಳ ಗಂಡನ ಹೆಸರ ಕೇಳಬೇಕು |

ಮೊನ್ನೆ ತಾವರೆಗೆರೆಯ ಜೋಯಿಸರ ಮೊಮ್ಮಗನು
ಹೆಣ್ಣ ನೋಡಲು ಬಂದ ಅವರ ಮನೆಗೆ
ವೈದಿಕರ ಮನೆಗಳಲಿ ಊಟ ಹೊತ್ತಾಗುವುದು
ಒಲ್ಲೆನೆಂದಳು ಸೀತೆ ಕೋಣೆಯೊಳಗೆ |

ಮಗಳ ಮಾತನು ಕೇಳಿ ನಕ್ಕು ಬಿಟ್ಟರು ತಂದೆ
ಒಳಗೆ ನಂದಾದೀಪ ನಂದಿ ಹೋಗಿ
ಫಲವ ನುಡಿದುದು ಹಲ್ಲಿ ಹೇಳಲೇನಿದೆ ಮುಂದೆ?
ತೆರಳಿದನು ಜೋಯಿಸನು ತಣ್ಣಗಾಗಿ |

ಬೆಳಗಾಗ ಕೆರೆಯ ಬಳಿ ನನ್ನ ತಂಗಿಯ ಕಂಡು
ಕನ್ನೆ ತೋರಿದಳಂತೆ ಕಾರಣವನು
ಹೊನ್ನೂರ ಕೇರಿಯಲಿ ಬಂದಿದ್ದ ಹೊಸ ಗಂಡು
ತನ್ನ ಕೂದಲಿಗಿಂತ ಕಪ್ಪು ಎಂದು |

ನಮ್ಮೂರಿನಕ್ಕರೆಯ ಸಕ್ಕರೆಯ ಬೊಂಬೆಯನು
ನೋಡಬೇಕೇ ಇಂಥ ಕಪ್ಪು ಗಂಡು?
ಶಾನುಭೋಗರ ಮನೆಯ ತೋರಣವೇ ಹೇಳುವುದು
ಬಂದ ದಾರಿಗೆ ಸುಂಕವಿಲ್ಲವೆಂದು |

ಶಾನುಭೋಗರ ಮಗಳು ರತ್ನದಂತಹ ಹುಡುಗಿ
ಗಂಡು ಸಿಕ್ಕುವುದೊಂದು ಕಷ್ಟವಲ್ಲ
ಸರಿಯಾದ ಗಂಡೊದಗಿ ಹೆಣ್ಣು ಸುಖವಾಗಿರಲಿ
ತಡವಾದರೇನಂತೆ ನಷ್ಟವಿಲ್ಲ !

*     *    *     *       *       *

18 thoughts on “ಶಾನುಭೋಗರ ಮಗಳು – ಕೆ.ಎಸ್.ನರಸಿಂಹಸ್ವಾಮಿ”

  1. ಭೂತ says:

    ಅದ್ಭುತವಾದ ಗೀತೆ. ಜಿ.ವಿ. ಅತ್ರಿ ಸೊಗಸಾಗಿ ಹಾಡಿದ್ದಾರೆ.
    ಸಂಗೀತ ಮತ್ತು ರಾಗ ಸಂಯೋಜನೆ ಬಗ್ಗೆ ಎರಡು ಮಾತಿಲ್ಲ.

    ಪದ್ಯವನ್ನು ಹೆಣೆದಿರುವ ಶೈಲಿ ಸೊಗಸು. ಸರಳವಾಗಿ ಪದ್ಯ ಹೆಣೆಯುವುದನ್ನು ಕರಗತಗೊಳಿಸಿಕೊಂಡಿದ್ದರು ಈ ವ್ಯಕ್ತಿ.

    ಇದರ ಗೀತ ಚಿತ್ರವು ಚೆನ್ನಾಗಿದೆ.

    ಇಲ್ಲಿ ಸಾದರ ಪಡಿಸಿದ್ದಕ್ಕೆ ಧ.ವಾ.

    ಇಂತಿ
    ಭೂತ

  2. jAgRuti says:

    ಒಳ್ಳೆ ಮಜ ಕೊಡ್ತಾ ಇದ್ದೀರ.

    ಅಕ್ಕನ ಮಗಳು – http://www.kannadaaudio.com/Songs/Folk/home/AkkanaMagalu.php

    ಹಿರೆ ಭಾಗವತರ ಮಗಳು ಅಂತ ಯಾರಾದ್ರು ಇದ್ದಾರ ಅಂತ ಹುಡ್ಕಿ ಹೇಳ್ತೆನೆ ?

    ಬೀ.ಎಂ.ಶ್ರೀ ಅನುವಾದಿತ “ಕಾರಿ ಹೆಗ್ಗಡೆಯ ಮಗಳು” ಇದ್ದಾಳೆ ಅಂತ ಗೊತಾಯ್ತು. ಅದು ಕರಿ ನೊ ಅಥವ ಕಾರಿ ನೊ ಅಂತ Doubt.

    ಶ್ರೀಮಂತನ ಮಗಳು, ಲಾಯರ್ ಮಗಳು, ಮನೆ ಮಗಳು www. musicindiaonline. com ನಲ್ಲಿ ಸಿಗ್ತಾರೆ.

  3. sritri says:

    ಭೂತ ಹೆಸರಿಗೆ ತಕ್ಕಂತೆ ಆಗಾಗ ಮಾಯ,ಪ್ರತ್ಯಕ್ಷವಾಗುತ್ತಿರುತ್ತದೆ!! 🙂

    ಶಾನುಭೋಗರ ಮಗಳು ಗೀತಚಿತ್ರ ನನಗೂ ನೆನಪಿದೆ. ಇದರಲ್ಲಿ ಜೋಯಿಸನ ಪಾತ್ರಧಾರಿಯನ್ನು ಕಪ್ಪಾಗಿ ಕಾಣಿಸಲೆಂದು ಮುಖಕ್ಕೆ ಕರಿಬಣ್ಣ ಬಳಿದಂತಿತ್ತು 🙂

  4. sritri says:

    ಜಾಗೃತಿಯವರೇ, ನಿಮ್ಮಲ್ಲಿ ಹೆಣ್ಣುಗಳ ದೊಡ್ಡ ಪಟ್ಟಿಯೇ ಇದ್ದಂತಿದೆ, ಆದರೆ, “ಸಾಕು ಮಗಳು” ಕಲ್ಪನಾಳನ್ನು ಮರೆತಿದ್ದೀರಿ. 🙂

    “ಕಾರಿ ಹೆಗ್ಗಡೆಯ ಮಗಳು” ಎಂಬುದು ಸರಿ.

  5. ಜಿ.ವಿ. ಅತ್ರಿ ತುಂಬಾ ಸೊಗಸಾಗಿ ಹಾಡಿದ್ದಾರೆ ಈ ಸೊಬಗಿನ ಹಾಡನ್ನು.

  6. Shrilatha says:

    ಈ ಪದ್ಯಕ್ಕೋಸ್ಕರ ಕಾಯ್ತಾ ಇದ್ದೆ..

    “ವೈದಿಕರ ಮನೆಯಲ್ಲಿ ಊಟ ಹೊತ್ತಾಗುವುದು, ಒಲ್ಲೆನೆಂದಳು” .. what an excuse to make!!

  7. sritri says:

    “ಜಿ.ವಿ. ಅತ್ರಿ ತುಂಬಾ ಸೊಗಸಾಗಿ ಹಾಡಿದ್ದಾರೆ ಈ ಸೊಬಗಿನ ಹಾಡನ್ನು.”

    ಸುಶೃತ, ಅತ್ರಿಯವರ ಇನ್ನೂ ಕೆಲವು ಗೀತೆಗಳು ಬಹಳ ಚೆನ್ನಾಗಿವೆ. ಅತ್ರಿಯವರ ಅಕಾಲ ನಿಧನದಿಂದ ಸುಗಮ ಸಂಗೀತ ಕ್ಷೇತ್ರಕ್ಕೆ ಬಹಳ ನಷ್ಟವಾಯಿತು. 🙁

  8. sritri says:

    “ವೈದಿಕರ ಮನೆಯಲ್ಲಿ ಊಟ ಹೊತ್ತಾಗುವುದು, ಒಲ್ಲೆನೆಂದಳು” .. what an excuse to make!! ”

    ಈಗಿನ ವೈದಿಕರು ಕಾಲಕ್ಕೆ ತಕ್ಕಂತೆ update ಆಗಿದ್ದಾರೆ. ಊಟ ಮೊದಲಿನಷ್ಟು ಹೊತ್ತಾಗದೇನೊ 🙂

  9. ಭಾಗವತರು ಆನಂದತುಂದಿಲರಾಗಿದ್ದಾರೆ. “ಇಗೊಳ್ಳಿ, ನಿಮಗೆ ನನ್ನ ಕಂಠೀಹಾರ”ಃ-))

    ಹತ್ತಿರದ ಕೆರೆಯಿಂದ ತೊಳೆದ ಬಿಂದಿಗೆಯೊಳಗೆ
    ನೀರ ತರುವಾಗವಳ ನೋಡಬೇಕು
    ಕರುವನಾಡಿಸುವಾಗ ಮಲ್ಲಿಗೆಯ ಬನದೊಳಗೆ
    ಅವಳ ಗಂಡನ ಹೆಸರ ಕೇಳಬೇಕು |

    ಎಂಥ ಲಾಲಿತ್ಯತೆ ಪದಗಳಲ್ಲಿ. ‘ತರುವಾಗವಳ’ ಶಬ್ದ ನೋಡಿ. ಅದು ಇಡೀ ಸಾಲಿಗೆ ಲಯ ಕೊಡತ್ತೆ.

  10. “ಎಲ್ಲಿ ಹೋಗುವಿರಿ ನಿಲ್ಲಿ ಮೋಡಗಳೆ” ಪದ್ಯ ಇತ್ತಾ? ಅನ್ವೇಷಿಗಳಿಗೆ ಅದನ್ನೇ ಬದಲು ಮಾಡಿ ಏನಾದ್ರೂ ಬರಿಯೋಣಃ-)

  11. sritri says:

    ಭಾಗವತರೇ, ನಿಮ್ಮ ಕಂಠೀಹಾರ ನನಗೇಕೆ? ನೀವೇ ಇಟ್ಟುಕೊಳ್ಳಿ 🙂

    ಅದಿರಲಿ, ಕಂಠೀಹಾರ ಅಂದರೇನು? ಕಂಠದ ಹಾರವೇ?

  12. sritri says:

    “ಎಲ್ಲಿ ಹೋಗುವಿರಿ ನಿಲ್ಲಿ ಮೋಡಗಳೇ” ಕವಿತೆ ನನ್ನಲ್ಲಿಲ್ಲ. ಎಂ.ಎಸ್.ಶೀಲಾ ದನಿಯಲ್ಲಿ ಕೇಳಿರುವ ಈ ಹಾಡಿನ ಕೆಲವು ಸಾಲುಗಳು ನೆನಪಿವೆ. ಅನ್ವೇಷಿಗಳಿಗೆಂದು ಕವಿತೆ ಬರೆಯುತ್ತೀರಾದರೆ ಅದನ್ನೇ ಇಲ್ಲಿ ಬರೆಯುತ್ತೇನೆ.  ಪದಗಳಲ್ಲಿ ವ್ಯತ್ಯಾಸಗಳಿರಬಹುದು.

    (ಕವಿ:ಜಿ.ಎಸ್.ಶಿವರುದ್ರಪ್ಪ)

    ಎಲ್ಲಿ ಹೋಗುವಿರಿ ನಿಲ್ಲಿ ಮೋಡಗಳೇ ನಾಲ್ಕು ಹನಿಯ ಚೆಲ್ಲಿ
    ದಿನ ದಿನವೂ ಕಾದು ಬಾಯಾರಿ ಬೆಂದೆ ಬೆಂಗದಿರ ತಾಪದಲ್ಲಿ|

    ಜಡವಾದ ನಮ್ಮ ಬಡತನದ ನೋವು ನಿಮಗರಿವು ಆಗಲಹುದೇ?
    ನೀಲಿ ಗಗನದಲಿ ತೇಲಿ ಹೋಗುತಿಹ ನಿಮ್ಮ ಹಿಡಿಯಬಹುದೇ?

    ಓ ಬನ್ನಿ ಬನ್ನಿ ಓ ತನ್ನಿ ತನ್ನಿ ನನ್ನೆದೆಗೆ ತಂಪ ತನ್ನಿ
    ನೊಂದ ಜೀವರಿಗೆ ತಂಪನೀಯುವುದೇ ಪರಮ ಪೂಜೆಯೆನ್ನಿ

  13. ಜ್ಯೋತಿ says:

    http://supthadeepthi.blogspot.com/

    Veni, look at this….

  14. sritri says:

    ಓಹೋ! ಬ್ಲಾಗ್ ದೀಪ್ತಿ 🙂

    ಹರಿವ ಲಹರಿಯನ್ನು ತುಳಸಿವನದತ್ತ ತಿರುಗಿಸಲಾಗಿದೆ!

  15. ಬಹುಶಃ ಅದೇ ಅರ್ಥ ಇರಬೇಕು. ಚಲಚ್ಚಿತ್ರಗಳಲ್ಲಿ, ನಾಟಕಗಳಲ್ಲಿ, ಯಕ್ಷಗಾನಗಳಲ್ಲಿ ನೋಡಿಲ್ಲವ ನೀವು? ತುಂಬ ಸಂತೋಷವಾದಾಗ ಕಂಠೀಹಾರವನ್ನ ತಮ್ಮ ಮುಂದಿರುವ ವ್ಯಕ್ತಿಗೆ ಕೊಡ್ತಾರೆಃ-)

    ನಾನು ಸಂತೋಷದಿಂದ ಕೊಟ್ಟಿದ್ದನ್ನ ನಿರಾಕರಿಸಿದಿರೇ? ನನ್ನ ಪಾರಿತೊಷವನ್ನು ನಿರಾಕರಿಸುವ ಅಧಟು ಅಖಂಡಭೂಮಂಡಲದಲ್ಲೇ ಯಾರಿಗೂ ಇಲ್ಲ. ಅಂಥದ್ದರಲ್ಲಿ ನೀವು?? ನಿಮಗೂ ದೇವೇಂದ್ರನಿಗಾದ ಗತಿಯೇ ಒದಗುವುದು. (ನಾಯಕ ಆರ್ಭಟಿಸುವನು. ರಂಗದ ಮೇಲೆ ಪೂರ್ಣ ಬೆಳಕು ಬೀರುವುದು).

  16. ಜ್ಯೋತಿ says:

    ವೇಣಿ, ನನ್ನ ಬ್ಲಾಗ್ ವಿಳಾಸ ತುಸು ಬದಲಿಸಿಕೊಂಡಿದ್ದೇನೆ, ಗುರುತಿರಿಸಿಕೋ..
    http://suptadeepti.blogspot.com/

    ಧನ್ಯವಾದಗಳು.

  17. Shiv says:

    ಸುಬ್ಬಭಟ್ಟರ ಮಗಳು -ಶ್ಯಾನಭೋಗರ ಮಗಳು…
    ನಮ್ಮ ಜ.ಭಾಗವತರು ಮತ್ತೆ ಯಾರನ್ನು ನೋಡಬೇಕೆಂತೆ 🙂

    >>ಹನ್ನೆರಡು ತುಂಬಿಹುದು ಮದುವೆಯಿಲ್ಲ |
    ಹನ್ನೆರಡೆಕ್ಕೆ ಮದುವೆಯಿಲ್ಲ ಅಂತಾ ಚಿಂತೆಯೇ ??
    ಬಹುಷಃ ಆಗ ಪರಿಸ್ಥಿತಿ ಹಾಗೀತ್ತೇನೋ.

  18. ಶಿವು,
    ಅದ್ಯಾವುದೋ ‘ಕಾರಿ ಹೆಗ್ಗಡೆ’ಯ ಮಗಳೂ ಬರ್ತಾಳಂತೆಃ-))

Leave a Reply to jAgRuti Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Related Posts

ಆಸೆ – ಕೆ.ಎಸ್.ನಆಸೆ – ಕೆ.ಎಸ್.ನ

ಕವಿ – ಕೆ.ಎಸ್.ನರಸಿಂಹಸ್ವಾಮಿ ಗಾಯಕಿ – ಎಸ್.ಜಾನಕಿ ಸಂಗೀತ – ಸಿ.ಅಶ್ವಥ್           ಹಾಡು ಕೇಳಿ ಹಕ್ಕಿಯ ಹಾಡಿಗೆ ತಲೆದೂಗುವ ಹೂ ನಾನಾಗುವ ಆಸೆ ಹಸುವಿನ ಕೊರಳಿನ ಗೆಜ್ಜೆಯ ದನಿಯು ನಾನಾಗುವ ಆಸೆ ಹಬ್ಬಿದ ಕಾಮನ ಬಿಲ್ಲಿನ ಮೇಲಿನ ಮುಗಿಲಾಗುವ ಆಸೆ ಚಿನ್ನದ

ಎದೆಯು ಮರಳಿ ತೊಳಲುತಿದೆ – ಎಂ. ಗೋಪಾಲಕೃಷ್ಣ ಅಡಿಗಎದೆಯು ಮರಳಿ ತೊಳಲುತಿದೆ – ಎಂ. ಗೋಪಾಲಕೃಷ್ಣ ಅಡಿಗ

ಕವಿ : ಎಂ. ಗೋಪಾಲಕೃಷ್ಣ ಅಡಿಗ ಸಂಗೀತ : ಮೈಸೂರು ಅನಂತಸ್ವಾಮಿ ಗಾಯಕಿ : ರತ್ನಮಾಲಾ ಪ್ರಕಾಶ್ ಹಾಡು ಕೇಳಿ ಎದೆಯು ಮರಳಿ ತೊಳಲುತಿದೆ ದೊರೆಯದುದನೆ ಹುಡುಕುತಿದೆ ಅತ್ತ ಇತ್ತ ದಿಕ್ಕುಗೆಟ್ಟು ಬಳ್ಳಿ ಬಾಳು ಚಾಚುತಿದೆ ತನ್ನ ಕುಡಿಯನು ಸಿಗಲಾರದ ಆಸರಕೆ

ನನ್ನ ಬಯಕೆ – ಕುವೆಂಪುನನ್ನ ಬಯಕೆ – ಕುವೆಂಪು

ಕವಿ – ಕುವೆಂಪು ಹಾಡು ಕೇಳಿ ಸದ್ದಿರದ ಪಸುರುಡೆಯ ಮಲೆನಾಡ ಬನಗಳಲಿ ಮೊರೆವ ತೊರೆಯೆಡೆಯಲ್ಲಿ ಗುಡಿಸಲೊಂದಿರಲಿ. ಅಲ್ಲಿ ಗಿಳಿ ಗೊರವಂಕ ಕೋಗಿಲೆಗಳಿಂಚರವು ಕಲೆಯುತಲೆಯಲೆಯಾಗಿ ತೇಲಿ ಬರುತಿರಲಿ. ಅಲ್ಲಿ ಬಳಿ ಪಸಲೆಯಲಿ ದನಗಳಂಬಾ ಎಂಬ ದನಿಯು ದನ ಕಾಯುವನ ಕೊಳಲೊಡನೆ ಬರಲಿ. ಅಲ್ಲಿ