ಎಷ್ಟು ಚಂದವಿರಬಹುದು?


ಎಲ್ಲೋ ಕಗ್ಗತ್ತಲು ತುಂಬಿದ ಕಾಡಲ್ಲಿ
ಕತ್ತದುಮಿ, ಉಸಿರುಗಟ್ಟಿಸುವ ಗೂಡಲ್ಲಿ,
ಮಾನವೀಯತೆ ಮಾರಿಕೊಂಡ
ಕಾಡುಜನಗಳ ನಡುವೆ
ಅವಮಾನ, ಆತಂಕ, ನೋವು ತುಂಬಿ
ಜಿಗುಟು ಜಿಗುಟಾದ ಕಪ್ಪು ನೆಲದಲ್ಲಿ
ಜಾರದಂತೆ ಗಟ್ಟಿಯಾಗಿ ಕಾಲೂರಿ ನಿಂತು
ಭರವಸೆಯ ಬೆಳಕಿಗಾಗಿ ದಿಕ್ಕುಗಳೆಡೆಗೆ
ಅಸೆ ನೋಟ ಹರಿಸುತ್ತಾ
ಮೈ ಮರೆತು ಕಾದುಕೂತು,
ಮನದೆಲ್ಲಾ ಮಧುರ ಭಾವನೆಗಳ
ಬಂಡವಾಳ ಹೂಡಿ
ಸುಂದರ ಕವಿತೆ ಬರೆವ
ನನ್ನ ಪ್ರೇಮದ ಕವಿ,
ನಿನ್ನ ಮಾಯಾ ಹಸ್ತದಿಂದ ಮೂಡಿ ಬಂದ
ಈ ಜಡಕವಿತೆಗಳೇ ಇಷ್ಟೊಂದು
ಚಂದವಿರುವಾಗ
ಇವುಗಳ ಉಗಮಸ್ಥಾನವಾದ
ನಿನ್ನ ಹಿಡಿಯಾಕಾರದ ಹೃದಯ
ಎಷ್ಟು ಚಂದವಿರಬಹುದು?
ಆ ಹೃದಯಕ್ಕೆ ತೆರೆತೆರೆಯಾಗಿ ಅಪ್ಪಳಿಸುವ
ಬೆಚ್ಚನೆ ಕೆಂಪು ರಕ್ತದ
ಅಚ್ಚ ಬಿಳುಪು ಜೀವನಪ್ರೇಮ
ಮತ್ತೆಷ್ಟು ಚಂದವಿರಬಹುದು?

************* ************

4 thoughts on “ಎಷ್ಟು ಚಂದವಿರಬಹುದು?”

  1. ಬೆಚ್ಚನೆ ಕೆಂಪು ರಕ್ತದಿಂದ ಉಕ್ಕುವ ಅಚ್ಚ ಬಿಳುಪು ಜೀವನ ಪ್ರೇಮದ ಚಂದ ಹುಟ್ಟಿಸಿದ ಅಚ್ಚರಿಯೇ ಇಷ್ಟು ಅಂದವಿರುವಾಗ, ಇವೆಲ್ಲದರ ಉಗಮ ಸ್ಥಾನ ಇನ್ನೆಂಥಾದ್ದಿರಬಹುದು?

  2. sunaath says:

    ಕವಿತೆ ಸೊಗಸಾಗಿದೆ, ಮನೋವೇಧಕವಾಗಿದೆ. ಸಣ್ಣದೊಂದು ವಿರೋಧ, ‘ ಅಚ್ಚು ಬಿಳುಪು ಜೀವನ ಪ್ರೇಮ’ ಅಂತ ಹೇಳಲಿಕ್ಕೆ. ಹಾಗೆ ಹೇಳುವದು ಬಿಳಿಯರ ವರ್ಣೋತ್ತಮಿಕೆಯ ಘೋಷಣೆಯನ್ನು ಒಪ್ಪಿಕೊಂಡಂತಲ್ಲವೆ?

  3. sritri says:

    ಓಹೋ! ಸುನಾಥರೇ, ಈ ಕವನ ನನ್ನ ಚಿಕ್ಕ ವಯಸ್ಸಿನಲ್ಲಿ ಬರೆದಿದ್ದು. ಆಗ ನನಗೆ ವರ್ಣ ಭೇದ, ವರ್ಗ ಭೇದಗಳ ಬಗೆಗೆ ಅಷ್ಟಾಗಿ ತಿಳಿದೇ ಇರಲಿಲ್ಲವೆಂದುಕೊಳ್ಳುತ್ತೇನೆ. ಬಹುಶಃ ಅಚ್ಚ ಬಿಳುಪು ಎಂಬುದನ್ನು ನಿಷ್ಕಳಂಕ, ಶುದ್ಧ ಎಂಬ ಅರ್ಥದಲ್ಲಿ ಬಳಸಿರಬಹುದೇನೋ. 🙂 ಕವನದ ಜೊತೆಗೆ ಬರೆದ ದಿನಾಂಕ ಕೂಡ ಹಾಕಬೇಕಿತ್ತು. ಆದರೆ ನನ್ನಲ್ಲಿ ಪತ್ರಿಕೆಯ ಕತ್ತರಿಸಿದ ತುಣುಕುಗಳು ಮಾತ್ರ ಇವೆ. ಅದರಲ್ಲಿ ದಿನಾಂಕ ಲಭ್ಯವಿಲ್ಲ.

    ಜ್ಯೋತಿ, ಪ್ರತಿಕ್ರಿಯೆಗೆ ಧನ್ಯವಾದಗಳು.

  4. sunaath says:

    Sorry, ತ್ರಿವೇಣಿಯವರೆ! ಕವಿತೆ ತುಂಬಾ ಚೆನ್ನಾಗಿದೆ. ಈ ಕವಿತೆ ಚಿಕ್ಕ ವಯಸ್ಸಿನಲ್ಲಿಯೆ ನೀವು ಬೆಳೆಯಿಸಿಕೊಳ್ಳುತ್ತಿದ್ದ ಸಾಮಾಜಿಕ ಪ್ರಜ್ಞೆಯನ್ನು ತೋರಿಸುತ್ತದೆ. ನಿಮಗೆ ಮತ್ತೊಮ್ಮೆ ಅಭಿನಂದನೆಗಳು.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Related Posts

ವಾರ್ಡ್ ನಂಬರ್ ಸೊನ್ನೆವಾರ್ಡ್ ನಂಬರ್ ಸೊನ್ನೆ

ಆಸ್ಪತ್ರೆಯ ಆ ವಾರ್ಡಿನ ಹೆಸರೇ ವಿಚಿತ್ರ, ನಿಜ. ಪೊಲೀಸರ ಹಿಂಡು. ಅವಳು ಬಾಯ್ತೆರೆದು ನುಡಿಯಾಡುವುದನೆ ಕಾದು ಕುಳಿತಿತ್ತು. ಅದೊಂದು ಯಾತನೆಯ ಮೊತ್ತ ಅತ್ತಿತ್ತ ಚಲಿಸಲಾರದು, ಮಗ್ಗುಲು ಹೊರಳಲಾರದು, ಮೂಗು-ಕಣ್ಣು ಗುರುತಿಸಲಾಗದ ಕರಿ ನೆರಳು ; ಬರೀ ನರಳುವ ಕೊರಳು ‘ಹೂಂ ಹೇಳಮ್ಮಾ….

ನಿನ್ನ ಕಾಡುವುದಿಲ್ಲವೇ?ನಿನ್ನ ಕಾಡುವುದಿಲ್ಲವೇ?

ಅಂದಿನಿಂದ ಇಂದಿನವರೆಗೂ ಜೊತೆ ಜೊತೆಯಾಗೇ ನಡೆದುಬ೦ದೆವಲ್ಲಾ ಬದುಕ ಹಿರಿದಾರಿಯುದ್ದಕ್ಕೂ…. ಪಯಣದ ಹಾದಿಯಲ್ಲಿ – ಕಂಡಿದ್ದು, ಉಂಡಿದ್ದು ನೂರಾರು. ತಂಪಿನ ನೆಳಲಲ್ಲಿ ಸುಖಿಸಿದ್ದುಂಟು, ಬೆಂಕಿಯ ಮಡಿಲಲ್ಲಿ ಬಳಲಿದ್ದುಂಟಾದರೂ ಅದಾವುದೂ ಮರೆಯದ ನೆನಪಾಗುಳಿಯದೆ, ಅಂದು ನೂರು ನಿಟ್ಟುಸಿರುಗಳ ಮರೆಸಿ ನಾವು ನಕ್ಕ ಆ ಒ೦ದೊ೦ದು

ಹನಿಗವನಗಳುಹನಿಗವನಗಳು

“ಮಯೂ(yU)ರ”ದಲ್ಲಿ ಪ್ರಕಟಿತ ಹನಿಗವನಗಳು ತಿದ್ದುಪಡಿ ಮಗು, ಸರಿಯಾಗಿ ಓದಿ ನೋಡು- ಈ ಪ್ರಪಂಚದಲ್ಲಿರುವ ವಿಸ್ಮಯಗಳು ಏಳೇ ಏಳಲ್ಲ ನಿನ್ನನ್ನೂ ಸೇರಿಸಿಕೊಂಡು ಅಂತಹ ಆನಂದದ ಅದ್ಭುತಗಳು ಎಂಟಿರಬೇಕು! *** ಕೋರಿಕೆ ನಲ್ಲಾ, ನನ್ನ ಅಂತರಂಗದ ಮೃದಂಗವಾದನಕ್ಕೆ ನೀನು ತಲೆದೂಗಿ ದನಿಗೂಡದಿದ್ದರೂ ಬೇಡ, ಕಿವುಡಾಗದಿದ್ದರೆ