ಮಾತು – ಚೆನ್ನವೀರ ಕಣವಿ

ಕವಿ : ಚೆನ್ನವೀರ ಕಣವಿ

ಮುಂಜಾವದಲಿ ಹಸಿರು ಹುಲ್ಲು ಮಕಮಲ್ಲಿನಲಿ
ಪಾರಿಜಾತವು ಹೂವು ಸುರಿಸಿದಂತೆ,
ಮುಟ್ಟಿದರೆ ಮಾಸುತಿಹ ಮಂಜುಹನಿ ಮುತ್ತಿನಲಿ
ಸೃಷ್ಟಿ ಸಂಪೂರ್ಣತೆಯ ಬಿಂಬಿಪಂತೆ ;

ಮೆಲ್ಲೆದೆಯ ಸವಿಯೊಲುಮೆ ಕರಗಿ ಕಂಬನಿಯಾಗಿ
ಹೆಣ್ಣ ಕಣ್ಣಂಚಿನಲಿ ತುಳುಕುವಂತೆ,
ಸುಳಿಗಾಳಿಯೊಂದಿನಿತು ಸೂಸಿ ಬಂದರೂ ಸಾಕು;
ಮರವನಪ್ಪಿದ ಬಳ್ಳಿ ಬಳುಕುವಂತೆ ;

ನಾವು ಆಡುವ ಮಾತು ಹೀಗಿರಲಿ ಗೆಳೆಯ,
ಮೃದುವಚನ ಮೂಲೋಕ ಗೆಲ್ಲುವುದು ತಿಳಿಯ,
ಮೌನ ಮೊಗ್ಗೆಯನೊಡಿದು ಮಾತರಳಿ ಬರಲಿ
ಮೂರು ಘಳಿಗೆಯ ಬಾಳು ಮಗಮಗಿಸುತಿರಲಿ.

***

7 thoughts on “ಮಾತು – ಚೆನ್ನವೀರ ಕಣವಿ”

  1. pArijAta says:

    ಪದ್ಯ ಬಹಳ ಚೆನ್ನಾಗಿದೆ. ಎರಡನೆಯ ನುಡಿ ಅದರಲ್ಲೂ ಬಹಳ ಸೊಗಸಾಗಿದೆ.
    ಧನ್ಯವಾದಗಳು.

  2. ತ್ರಿವೇಣಿ,

    ಈ ಹಾಡನ್ನು ತುಂಬಾ ಸಮಯದಿಂದ ಹುಡುಕ್ತಿದ್ದೆ. ಇವತ್ತು ಇಲ್ಲಿ ನೋಡಿ ತುಂಬಾ ಖುಷಿಯಾಯ್ತು. ಪಾರಿಜಾತದ ಬಗ್ಗೆ ನಾನು ಬರೆದಿದ್ದ ಪೋಸ್ಟ್ ಇಲ್ಲಿದೆ,
    http://sillylittlethings.blogspot.com/2006/05/flower-of-gods-garden.html

  3. ಸುನಾಥ says:

    ಈ ಕವಿತೆಯ ಶೀರ್ಷಿಕೆ ಸರಿಯಾಗಿಯೇ ಇದೆಃ “ಮಾತು”.
    ಈ ಕವಿತೆ ಸಹ “ಹೂವು ಹೊರಳುವವು ಸೂರ್ಯನ ಕಡೆಗೆ” ಸಂಕಲನದಲ್ಲಿ ಮರಳಿ ಸೇರ್ಪಡೆಯಾಗಿದೆ. ಕವಿತೆಯ ಎರಡನೆಯ, ಆರನೆಯ, ಒಂಬತ್ತನೆಯ ಹಾಗು ಹತ್ತನೆಯ ಸಾಲುಗಳಿಗೆ ಅಲ್ಪವಿರಾಮಗಳನ್ನು; ನಾಲ್ಕನೆಯ, ಏಳನೆಯ ಹಾಗು ಎಂಟನೆಯ ಸಾಲುಗಳಿಗೆ ಅರ್ಧವಿರಾಮವನ್ನು; ಕೊನೆಯ ಸಾಲಿಗೆ ಪೂರ್ಣವಿರಾಮವನ್ನು ಕೊಡಲಾಗಿದೆ.
    “ಮಗಮಗಿಸುತಿರಲಿ” ಎಂದು ತಿದ್ದಬೇಕು. ಕವಿ ತಮ್ಮ ಹೆಸರನ್ನು “ಚೆನ್ನವೀರ” ಎಂದು ಬರೆದುಕೊಳ್ಳುತ್ತಾರೆ,”ಚನ್ನವೀರ” ಎಂದಲ್ಲ. ಇದನ್ನು ಗಮನಿಸಬೇಕು.
    ಸುಂದರವಾದ ಕವನವನ್ನು ಆಯ್ಕೆ ಮಾಡಿದ್ದಕ್ಕಾಗಿ ಧನ್ಯವಾದಗಳು. ಕಣವಿಯವರ ಕವನಗಳನ್ನು ಓದುವಾಗ ಮನಸ್ಸು ತಂಪಾಗುತ್ತದೆ. ವಂದನೆಗಳು,
    -ಸುನಾಥ

  4. sritri says:

    “ಕಣವಿಯವರ ಕವನಗಳನ್ನು ಓದುವಾಗ ಮನಸ್ಸು ತಂಪಾಗುತ್ತದೆ.”

    – ನಿಜ. ಕೆ . ಎಸ್ ನರಸಿಂಹಸ್ವಾಮಿಯವರಂತೆ ಕಣವಿಯವರು ಸಹ ಆಪ್ತ ಭಾವ ಮೂಡಿಸುವ ಕವಿ.

    ಸುನಾಥರೆ, ನನ್ನ ನೆನಪಿನ ಆಧಾರದಿಂದ ಈ ಕವಿತೆಯನ್ನು ಬರೆದಿದ್ದೆ. ತಪ್ಪುಗಳನ್ನು ನೀವು ತಿದ್ದಿಕೊಡುತ್ತೀರೆಂಬ ನಂಬಿಕೆಯಿಂದ.:) ಹಾಗೆಯೇ ಕಣವಿಯವರ ಹೆಸರಿನ ಬಗ್ಗೆಯೂ ಗೊಂದಲವಿತ್ತು. ನಿಮ್ಮನ್ನೇ ಕೇಳಬೇಕೆಂದಿದ್ದೆ. ಧನ್ಯವಾದಗಳು.
    .

  5. sritri says:

    ಪಾರಿಜಾತ!! ಪಾರಿಜಾತದ ಕವಿತೆ ಕರೆಯಿತೇ ತುಳಸೀವನಕ್ಕೆ ನಿಮ್ಮನು? 🙂

    “ಪದ್ಯ ಬಹಳ ಚೆನ್ನಾಗಿದೆ. ಎರಡನೆಯ ನುಡಿ ಅದರಲ್ಲೂ ಬಹಳ ಸೊಗಸಾಗಿದೆ.”

    – ನನಗೂ ಎರಡನೆಯ ನುಡಿಯ ಮೊದಲೆರಡು ಸಾಲುಗಳು ತುಂಬಾ ಪ್ರಿಯ. “ಮೆಲ್ಲೆದೆಯ ಸವಿಯೊಲುಮೆ ಕರಗಿ ಕಂಬನಿಯಾಗಿ
    ಹೆಣ್ಣ ಕಣ್ಣಂಚಿನಲಿ ತುಳುಕುವಂತೆ” – ಈ ಸಾಲುಗಳು ಬರೆಯಲು ಕವಿಗೆ ಸಹಜ ಪ್ರತಿಭೆಯ ಜೊತೆಗೆ ನವಿರಾದ ಭಾವನೆಗಳನ್ನು ಹೊಮ್ಮಿಸುವ ಸುಕೋಮಲ ಹೃದಯವೂ ಇರಲೇಬೇಕು!

  6. sritri says:

    ಶ್ರಿಲತಾ, ಈಚೆಗೆ ಕಾಣಲಿಲ್ಲ ನೀವು. ಲಿಂಕ್ ಕೊಟ್ಟಿದ್ದಕ್ಕೆ ಧನ್ಯವಾದಗಳು. ಪಾರಿಜಾತದ ಬಗ್ಗೆ ಏನು ಬರೆದಿದ್ದೀರಿ ಎಂದು ತಿಳಿಯುವ ಕುತೂಹಲ. ಈಗಲೇ ಓದುತ್ತೇನೆ.

  7. ಮೊನ್ನೆ ಮಧ್ಯಾಹ್ನದಿಂದ ತುಳಸೀವನ ಡಲ್ಲಾಗಿದೆಯಲ್ಲಾ? ಎಂದಿನ ಲಹರಿ ಕಳಕೊಂಡ ಹಾಗಿದೆ. ಏನಾಯ್ತು?

Leave a Reply to pArijAta Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Related Posts

ಮಲ್ಲಿಗೆ ಕವಿಯ ಸವಿ ನೆನಪಲ್ಲಿಮಲ್ಲಿಗೆ ಕವಿಯ ಸವಿ ನೆನಪಲ್ಲಿ

ಕವಿ – ಕೆ.ಎಸ್.ನರಸಿಂಹಸ್ವಾಮಿ ಹಾಡು ಕೇಳಿ  ನಿನ್ನೊಲುಮೆಯಿಂದಲೇ ಬಾಳು ಬೆಳಕಾಗಿರಲು ಚಂದ್ರಮುಖಿ ನೀನೆನಲು ತಪ್ಪೇನೆ? ನಿನ್ನ ಸೌಜನ್ಯವೇ ದಾರಿ ನೆರಳಾಗಿರಲು ನಿತ್ಯ ಸುಖಿ ನೀನೆನಲು ಒಪ್ಪೇನೆ? ನಿನ್ನ ನಗೆಮಲ್ಲಿಗೆಯ ಪರಿಮಳದ ಪಾತ್ರೆಯಲಿ ಚೆಲ್ಲಿ ಸೂಸುವ ಅಮೃತ ನೀನೇನೆ ನನ್ನ ಕನಸುಗಳೆಲ್ಲ ಕೈಗೊಳುವ

ತಾಯೆ ಬಾರ ಮೊಗವ ತೋರ ಕನ್ನಡಿಗರ ಮಾತೆಯೆತಾಯೆ ಬಾರ ಮೊಗವ ತೋರ ಕನ್ನಡಿಗರ ಮಾತೆಯೆ

ಕವಿ – ಮಂಜೇಶ್ವರ ಗೋವಿಂದ ಪೈ ಹಾಡು ಕೇಳಿ ತಾಯೆ ಬಾರ ಮೊಗವ ತೋರ ಕನ್ನಡಿಗರ ಮಾತೆಯೆ ಹರಸು ತಾಯೆ ಸುತರ ಕಾಯೆ ನಮ್ಮ ಜನ್ಮದಾತೆಯೆ ನಮ್ಮ ತಪ್ಪನೆನಿತೊ ತಾಳ್ವೆ ಅಕ್ಕರೆಯಿಂದೆಮ್ಮನಾಳ್ವೆ ನೀನೆ ಕಣಾ ನಮ್ಮ ಬಾಳ್ವೆ ನಿನ್ನ ಮರೆಯಲಮ್ಮೆವು ತನು

ಕನಸಿನೊಳಗೊಂದು ಕಣಸು – ಅಂಬಿಕಾತನಯದತ್ತಕನಸಿನೊಳಗೊಂದು ಕಣಸು – ಅಂಬಿಕಾತನಯದತ್ತ

ಕವನ -ಕನಸಿನೊಳಗೊಂದು ಕಣಸುಕವಿ – ದ.ರಾ.ಬೇಂದ್ರೆ(ಅಂಬಿಕಾತನಯದತ್ತ)          ತಾಯಿ ಮಕ್ಕಳ ಸಂವಾದ(ಈಗಿನ ಕನ್ನಡ ನಾಡಿನ ಮತ್ತು ಕನ್ನಡಿಗರ ಸ್ಥಿತಿಯ ಚಿತ್ರ) “ಯಾರು ನಿಂದವರಲ್ಲಿ ತಾಯೆ” ಎಂದೆ  “ಯಾರು ಕೇಳುವರೆನಗೆ, ಯಾಕೆ ತಂದೆ ?” “ಬೇಸರದ ದನಿಯೇಕೆ ಹೆಸರ ಹೇಳಲ್ಲ”  “ಹೆಸರಾಗಿಯೂ ಕೂಡ ಹೇಳ ಹೆಸರಿಲ್ಲ”