ಏಕೆನ್ನ ಈ ರಾಜ್ಯಕ್ಕೆಳೆತಂದೆ?

ರಾಗ: ತೋಡಿ ತಾಳ: ದೀಪ್ ಚಂಡಿ

ಏಕೆನ್ನ ಈ ರಾಜ್ಯಕ್ಕೆಳೆತಂದೆ ಹರಿಯೇ
ಸಾಕಲಾರದೆ ಎನ್ನ ಏಕೆ ಪುಟ್ಟಿಸಿದೆ

ಎನ್ನ ಕುಲದವರಿಲ್ಲ ಎನಗೊಬ್ಬ ಹಿತರಿಲ್ಲ
ಮನ್ನಿಸುವ ದೊರೆಯಿಲ್ಲ ಮನಕೆ ಹಿತವಿಲ್ಲ
ಹೊನ್ನುಚಿನ್ನಗಳಿಲ್ಲ ಒಲಿಸಿಕೊಂಬುವರಿಲ್ಲ
ಇನ್ನಿಲ್ಲಿ ತರವಲ್ಲ ಇಂದಿರೇಶನೆ ಬಲ್ಲ

ದೇಶ ಪರಿಚಯವಿಲ್ಲ ದೇಹದೊಳು ಬಲವಿಲ್ಲ
ವಾಸಿಪಂಥಗಳೆಂಬೊ ಒಲುಮೆ ಎನಗಿಲ್ಲ
ಬೇಸರ ಕಳೆವರಿಲ್ಲ ಬೇರೆ ಹಿತಜನರಿಲ್ಲ
ವಾಸುದೇವನೆ ಬಲ್ಲ ಈ ರಾಜ್ಯವೆಲ್ಲ

ಕರೆದು ಕೊಡುವವರಿಲ್ಲ ಕರುಣೆ ತೋರುವವರಿಲ್ಲ
ಕಮಲಾಕ್ಷನಲ್ಲದೆ ಗತಿಯೊಬ್ಬರಿಲ್ಲ
ಕನಸಲಿ ಕಳುವಿಲ್ಲ ಮನಸಲಿ ಧೃಢವಿಲ್ಲ
ವನಜಾಕ್ಷ ಪುರಂದರವಿಠಲ ತಾ ಬಲ್ಲ

***

ಪುರಂದರದಾಸರ ಈ ರಚನೆಯನ್ನು ತುಳಸಿವನದ ಸಂಗ್ರಹಕ್ಕೆಂದು ಕಳಿಸಿಕೊಟ್ಟ ಶ್ರೀನಾಥ್ ಭಲ್ಲೆಯವರು ಜೊತೆಗೊಂದು ಟಿಪ್ಪಣಿಯನ್ನೂ ಸೇರಿಸಿದ್ದಾರೆ:-

“ಈ ಹಾಡನ್ನು ದೃಶ್ಯ ಕಾವ್ಯವಾಗಿಸಿದಲ್ಲಿ ‘ವೃದ್ದಾಶ್ರಮದಲ್ಲಿನ ಹಿರಿಯರು’, ‘ತನ್ನವರಿಂದ ದೂರಾದವರು’, ‘ಮಗ-ಸೊಸೆ/ಮಗಳು-ಅಳಿಯ ಕೆಲಸಕ್ಕೆ ಹೋದ ಮೇಲೆ ಮಾಡಲೇನೂ ಕೆಲಸವಿಲ್ಲದ ಅಮೇರಿಕಕ್ಕೆ ಬಂದ ಹಿರಿಯರು’ ಮತ್ತು ‘ಅಮೇರಿಕದಲ್ಲಿ ನೆಲೆಸಿ ದಿನಕ್ಕೆ ಹೆನ್ನೆರಡು ಘಂಟೆ ದುಡಿವ ಗಂಡನ ಡ್ರೈವಿಂಗ್-ಬಾರದ ಹೆಂಡತಿ’ ಮೇಲೆ ಚಿತ್ರಿತವಾಗಬಹುದು.”

2 thoughts on “ಏಕೆನ್ನ ಈ ರಾಜ್ಯಕ್ಕೆಳೆತಂದೆ?”

  1. sunaath says:

    ಪುರಂದರದಾಸರ ಭವಿಷ್ಯದೃಷ್ಟಿ ಮೆಚ್ಚತಕ್ಕಂತಹದ್ದು!

  2. sritri says:

    ಕಾಕಾ, ಈ ಹಾಡು ಪುರಂದರದಾಸರ ಭವಿಷ್ಯ ದೃಷ್ಟಿ ಎನ್ನುತ್ತೀರಾ? ನಾನು ಇದನ್ನು ಪುರಂದರದಾಸರ ವರ್ತಮಾನದ (ಅವರ ಕೊನೆಯ ದಿನಗಳ) ಅನುಭವಿರಬಹುದೆಂದು ಭಾವಿಸಿದ್ದೆ. ವಿಜಯನಗರ ಸಾಮ್ರಾಜ್ಯ ಪತನದ ನಂತರ, ಪರಕೀಯ ಆಳ್ವಿಕೆಗೆ ಒಳಗಾದ ರಾಜ್ಯವನ್ನು ಬಿಟ್ಟು ಪುರಂದರದಾಸರು ಮತ್ತಾವುದೋ ಸ್ಥಳಕ್ಕೆ ಹೋಗಿ, ಅಲ್ಲಿ ಅವರು ಅನುಭವಿಸಿರಬಹುದಾದ ಪಾಡೇ ಈ ಹಾಡಾಗಿರಬಹುದೇ ಅನ್ನಿಸಿತ್ತು. ಈ ಬಗ್ಗೆ ನಿಮಗೇನಾದರೂ ಗೊತ್ತಿದ್ದರೆ ದಯವಿಟ್ಟು ತಿಳಿಸಿಕೊಡಿ.

    `ಏಕೆನ್ನ ಈ ರಾಜ್ಯಕ್ಕೆಳೆತಂದೆ?’ ಎನ್ನುವಲ್ಲಿ `ಈ ರಾಜ್ಯ’ ಎನ್ನುವ ಬದಲು ‘ಅದಾವ ರಾಜ್ಯ’ ಎಂದು ದಾಸರು ಸ್ಪಷ್ಟವಾಗಿ ಉಲ್ಲೇಖಿಸಿದ್ದರೆ ನಮ್ಮ ಹಿನ್ನೋಟ ಇನ್ನಷ್ಟು ವಿಶಾಲವಾಗುತ್ತಿತ್ತೇನೊ.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Related Posts

ಕಟಿಯಲ್ಲಿ ಕರವಿಟ್ಟನೊ ಪಂಢರಿರಾಯಕಟಿಯಲ್ಲಿ ಕರವಿಟ್ಟನೊ ಪಂಢರಿರಾಯ

ರಚನೆ – ಪುರಂದರದಾಸರು ಹಾಡು ಕೇಳಿ – ವಿದ್ಯಾಭೂಷಣ ಹುಸೇನ್ ಸಾಹೇಬ್ ಕಟಿಯಲ್ಲಿ ಕರವಿಟ್ಟನೊ ಪಂಢರಿರಾಯ ಕಟಿಯಲ್ಲಿ ಕರವಿಟ್ಟನೊ ||ಪಲ್ಲವಿ|| ಗೊಲ್ಲ ಬಾಲಕರೊಡಗೂಡಿ ತಾ ಬಂದು ಗೊಲ್ಲತಿಯರ ಮನೆ ಕದ್ದು ಬೆಣ್ಣೆಯ ತಿಂದು ಬಲ್ಲಿದ ತೃಣಾವರ್ತ ಮೊದಲಾದ ಅಸುರರ ಮೆಲ್ಲನೆ ಕೊಂದಾಯಾಸದಿಂದಲೋ

ಆರು ಬಾಳಿದರೇನು? ಆರು ಬದುಕಿದರೇನು?ಆರು ಬಾಳಿದರೇನು? ಆರು ಬದುಕಿದರೇನು?

ರಚನೆ : ಕನಕದಾಸರು ಆರು ಬಾಳಿದರೇನು ಆರು ಬದುಕಿದರೇನು ನಾರಾಯಣನ ಸ್ಮರಣೆ ನಮಗಿಲ್ಲದನಕ ||ಪ|| ಉಣ್ಣಬರದವರಲ್ಲಿ ಊರೂಟವಾದರೇನು ಹಣ್ಣು ಬಿಡದ ಮರ ಹಾಳಾದರೇನು ಕಣ್ಣಿಲ್ಲದವಗಿನ್ನು ಕನ್ನಡಿಯಿದ್ದು ಫಲವೇನು ಪುಣ್ಯವಿಲ್ಲದವನ ಪ್ರೌಢಿಮೆ ಮೆರೆದರೇನು ||೧|| ಅಕ್ಕರಿಲ್ಲದವರಿಗೆ ಮಕ್ಕಳಿದ್ದು ಫಲವೇನು ಹೊಕ್ಕು ನಡೆಯದ ನಂಟತನದೊಳೇನು

ರಥವಾನೇರಿದ ರಾಘವೇಂದ್ರ ಸದ್ಗುಣಗಣಸಾಂದ್ರರಥವಾನೇರಿದ ರಾಘವೇಂದ್ರ ಸದ್ಗುಣಗಣಸಾಂದ್ರ

ರಥವಾನೇರಿದ ರಾಘವೇಂದ್ರ ಸದ್ಗುಣಗಣಸಾಂದ್ರ ಸತತ ಮಾರ್ಗದಿ ಸಂತತ ಸೇವಿಪರಿಗೆ ಅತಿಹಿತದಲಿ ಮನೋರಥವ ಕೊಡುವೆನೆಂದು ||ಪಲ್ಲವಿ|| ಚತುರ ದಿಕ್ಕು ವಿದಿಕ್ಕುಗಳಲ್ಲಿ ಚರಿಪ ಜನರಲ್ಲಿ ಮಿತಿಯಿಲ್ಲದೆ ಬಂದೋಲೈಸುತಲಿ ವರವ ಬೇಡುತಲಿ ನುತಿಸುತ ಪರಿಪರಿ ನತರಾಗಿಹರಿಗೆ ಗತಿ ಪೇಳದೆ ಸರ್ವಥಾ ನಾ ಬಿಡೆನೆಂದು ||೧|| ಅತುಳ